މަޝްހޫރު ފިލްމީ ތަރި އަދި ޕްރޮޑިއުސަރު އަލީ ސީޒަންގެ ފޭސްބުކް އައިޑީ އާއި އޭނާގެ ފިލްމުތަކުގެ އެފްބީ ޕޭޖްތައް ހެކްކޮށްފިއެވެ.

ހެކްކޮށްފައިވަނީ ސީޒަންގެ ޕްރޮޑަކްޝަންގެ ފިލްމުތައް ކަމަށްވާ، އަނދިރިކަން, އަހްޝަމްގެ އިތުރުން ސީޒަންގެ ޕަބްލިކް ޕޭޖްއެވެ. ސީޒަން ބުނީ، ހެކްކުރީ މީހުން އޭނާގެ އެފްބީ އައިޑީ ގައި ތިބި މީހުންނަށް މެސެޖް ކުރަމުންދާ ކަމަށެވެ.

އަދި ފޭނުންންގެ ފަރާތުން އެ މީހުންނަށް މެސެޖް ކުރަމުންދާ ކަމުގެ ޝަކުވާތައް ލިބެމުންދާ ކަމަށެވެ. ސީޒަންގެ އައިޑީން ފޮނުވާ މެސެޖްތަކަށް ރިޕްލައި ނުކުރަން އޭނާ ވަނީ އައިލާއާ ގާތް ރައްޓެހިންގެ އިތުރުން ފޭނުންގެ ފަރާތުން އެދިފައެވެ.

ސީޒަން މިހާރު ދަނީ ދެ ފިލްމެއްގެ މަސައްކަތް ކުރަމުންނެވެ. އެއީ ލޯބިވެވިއްޖެ އާއި އަނދިިރިކަން ފިލްމެވެ. ދާދި ފަހުން އޮލިމްޕަހުން ފިލްމުތައް އަޅުވާ ތާރީހު ހާމަކުރުމުން ސީޒަން ވަނީ އޭނާގެ ފިލްމު ''އަނދިރިކަން'' ރިލީޒް ކުރާނެ ތާރިހް އިއުލާންކޮށްފައެވެ.

ސީޒަންގެ އެސް ޕްރޮޑަކްޝަނުން އުފައްދާ ލޯބިވެވިއްޖެގެ 50 ޕަސެންޓް ޝޫޓްކޮށް ނިންމާލާފައިވާ ކަމަށް އޭނާ ވަނީ ބުނެފައެވެ. އެ ފިލްމުގެ މަންޒަރުތައް ގދ. ތިނަދޫގައި ނަގާ ނިންމާލާފައިވާއިރު، ފިލްމުގެ އިތުރު ލަވައެއް އެ ރަށުގައި ނަގަން ވަނީ ނިންމާފައެވެ. ލޯބިވެވިއްޖެގެ މަންޒަރުތަކެއް ލަންކާގައި ނެގުމަށް ހަމަޖެހިފައިވާއިރު ކްރޫން ފުރާނެ ތާރިހެއް އަދި މިހާތަނަށް ހާމަކޮށްފައެއް ނުވެއެވެ.

މި ފިލްމު ޑައިރެކްޓް ކުރަނީ ސީޒަންގެ އަންހެނުން އައިމިނަތު ޝާނަޒްގެ އިތުރުން ޝާނިޒް އަލީ އެވެ. ލޯބީގެ ވާހަކައެއްގެ މައްޗަށް ބިނާކޮށް އުފައްދާ ފިލްމުގެ ކާސްޓުންގެ ތެރޭގައި މަރިޔަމް ޢައްޒަ، ޢަލީ ޢާޒިމް (ދޮން އައްޔަ) އިރުފާނާ އިބްރާހީމް، އަދި އަޙްމަދު އީސަ (އާނަންދު) ހިމެނެއެވެ.