ސަރވިސް ޗާރޖަށް ދެނީ އެންމެ 11 ޑޮލަރު ކަމަށް ބުނުމުން ހޮނޑާފުށި އައިލެންޑް ރިސޯޓްގެ މުވައްޒަފަކު ވަޒީފާއިން ވަކިކޮށްފިއެވެ.
ހޮނޑާފުށި ރިސޯޓުގައި ސެކިއުރިޓީ އޮފިސަރެއްގެ ވަޒީފާ އަދާކުރާ އަހުމަދު ޝިމްހާޒްގެ ވާހަކަ މީޑިއާތަކަށް ތިލަވެގެން ދިޔައީ ހޮނޑާފުށީ ރިސޯޓުން ނުޙައްޤުން ވަޒީފާއިން ވަކިކުރިކަމަށް ބުނެ ޓޫރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް (ޓީމް)ގެ މެމްބަރުންނަށް ޝިމްހާޒު ފޮނުވި މެސެޖެއް މީސްމީޑިއާގައި ވައިރަލްވި ހިސާބުންނެވެ.
އެ މެސެޖުގައި ޝިމްހާޒު ބުނެފައިވަނީ، އޭނާ ވަޒީފާއިން ވަކި ކުރަން އުޅޭ ކަމަށާއި، ވަޒީފާއިން ވަކިވި ކަމުގެ ލިއުމުގައި އޭނާ ލައްވާ ސޮއި ކުރުމަށް މަސައްކަތް ކުރަމުންދާ ކަމަށެވެ. އަދި އޭނާއަކީ ދުރު ހިސާބެއްގެ އަތޮޅެއްގެ މީހެއްކަމުން އެވަގުތު ވަޒީފާއިން ވަކިކޮށްފިނަމަ އުޅެންޖެހޭނީ ވަރަށް ދަތި ހާލުގައި ކަމަށްވެސް ބުނެފައިވެއެވެ.
އޭގެ އިތުރުން، ފަރުވާކުޑަ ކަމަށްބުނެ ރިސޯޓުން ވަޒީފާއިން ވަކި ކުރަނީ ނުޙައްޤުން ކަމަށާއި، އޭނާ އެފަދަ އެއްވެސް ކަމެއް ކޮށްފައިނުވާނެ ކަމަށްވެސް މެސެޖުގައި ބުނެފައިވެއެވެ.
އެކަމާއިގުޅޭގޮތުން ޓީމުގެ އޮފިޝަލް ފޭސްބުކް އެކައުންޓުގައި ކުރި ޕޯސްޓެއްގައި ބުނީ، ޝިމްހާޒް ވަޒީފާއިން ކަނޑާލި މައްސަލަ ވަރަށް ގާތުން ބަލަމުންދާ ކަމަށާއި، އޭނާއަށް ލިބެންޖެހޭ އެހީތެރިކަމާއި އެއްބާރުލުން ދޭނެ ކަމަށެވެ. އަދި އޭނާއަށް ޤާނޫނީ ގޮތުން ފޯރުކޮށްދެންޖެހޭ ހުރިހާ އެހީތެރިކަމެއް ފޯރުކޮށްދޭނެ ކަމަށްވެސް ބުނެފައިވެއެވެ.
އެކަމާއި ގުޅޭގޮތުން "ރާއްޖެއެމްވީ" އަށް މައުލޫމާތުދެމުން ހޮނޑާފުށި ރިސޯޓުގައި މަސައްކަތް ކުރާ މުވައްޒަފަކު ބުނީ، ޝިމްހާޒް ވަޒީފާއިން ވަކިކޮށްފައިވަނީ އެ ރިސޯޓުން ސަރވިސް ޗާރޖުގެ ގޮތުގައި ދެނީ 11 ޑޮލަރު ކަމަށް ބުނުމުން، ރިސޯޓުގެ ވާހަކަ އެގޮތަށް ދެއްކުމަކީ މަނާކަމެއް ކަމަށް ބުނެ ކަމަށެވެ. އެގޮތުން ރިސޯޓުން ފުރަތަމަ ޝިމްހާޒްއަށް ހުށައެޅީ އަމިއްލައަށް ވަޒީފާއިން ވަކިވުމަށް ކަމަށާއި، ނަމަވެސް އެގޮތަށް އެއްބަސް ނުވުމުން ވަޒީފާއިން ވަކިކުރީކަމަށް އޭނާ ބުންޏެވެ.
