ހަރުކަށި ފިކުރާއި، ޙަރަކާތްތަކާއި، މާރާމާރީތަކާއި، ގޭންގު ކުށްތަށް އަދި މަސްތުވާތަކެތީގެ މައްސަލަތަކަކީ ފަރުދީ ޒިންމާއަށް އިހުމާލުވުމުގެ ނަތީޖާކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވިދާޅުވެއްޖެއެވެ.
ދިވެހިންގެ އެއްބައިވަންތަކަމުގެ ދުވަހުގެ ރަސްމީ ޖަލްސާގައި ވާހަކަ ދައްކަވަމުން ރައީސް ވިދާޅުވީ މުޅި ޤައުމުގެ ޙާލަތަށް ބަލާއިރު، ދިވެހިންގެ އެއްބައިވަންތަކަމާއި އެކުވެރިކަން ކުރިއަށް ނެރެގެން ނޫނީ ޙައްލުކުރަން ދަތި ކިތަންމެ މައްސަލައެއް މިހާރުވެސް ދިވެހިންގެ ތެރޭގައި އެބަހުރި ކަމަށެވެ.
އެގޮތުން ދީނުގެ ނަމުގައި ފަތުރާ ހަރުކަށި ފިކުރުތަކާއި، ހިންގާ ހަރުކަށި ޢަމަލުތައް، މިއީ އޭގެ ތެރެއިން އެއް ކަންތައް ކަމަށެވެ. އަދި ދީނަށް އިހާނެތިކުރުމުގެ މަސައްކަތާއި، މާރާމާރީތަކާއި ގޭންގު ކުށްތައް އަދި މަސްތުވާތަކެތީގެ މައްސަލަތައް މީގެ ތެރޭގައި ހިމެނޭ ކަމަށެވެ. ރައީސް ވިދާޅުވީ މިފަދަ ކަންކަމަކީ ޤާނޫނުތައް ނެތިގެން، ނުވަތަ އަދަބުތައް ކަނޑައެޅިފައި ނެތިގެން ހިނގާ ކަންކަމެއް ނޫންކަމަށެވެ.
މި ބާވަތުގެ ކޮންމެ ކަމަކީވެސް، ފަރުދީ ޒިންމާއަށް އިހުމާލުވުމުގެ ނަތީޖާ. މުޖުތަމަޢުގެ މަޞްލަޙަތުގެ މައްޗަށް ތިމާގެ އަމިއްލަ ކަންކަން އިސްކުރުމުގެ ނަތީޖާ. އަނެކުންގެ ޙައްޤުތަކަށް އަރިގަނެގެންވިޔަސް، ތިމާގެ އަމިއްލަ އެދުންތައް ހާސިލުކުރަން އުޅުމުން، ގެއްލިގެން އެދަނީ މުޅި މުޖުތަމަޢުގެ ހަމަޖެހުމާއި އަމާންކަން. މިއަދު އަޅުގަނޑުމެން ޢަޒުމަކަށް ހަދަންވީ، މިފަދަ ހުރިހާ ކަމަކަށް ފާޅުގައި ދެކޮޅުހަދައި، އެފަދަ ކަންކަން ހުއްޓުވުމަށް މަސައްކަތް ކުރުން. އެފަދަ ކަންކަން ސިއްރުނުކޮށް، ކަމާބެހޭ އިދާރާތަކާ އެފަދަ މަޢުލޫމާތު ޙިއްޞާކުރުން. މުޅި މުޖުތަމަޢު އެކުގައި މިފަދަ ކަންކަމާ ދެކޮޅަށް ތެދުވެގެން ނޫނީ، ކިތަންމެވަރަކަށް މި ވާހަކަތައް ދެއްކިޔަސް، މިކަންކަން ޙައްލެއް ނުކުރެވޭނެ،ރައީސް އިބްރާހިމް މުހައްމަދު ސޯލިހު
ނޭއްގާނި ޢަމަލުތަކުގައި ޙަރަކާތްތެރިވާ ފަރާތްތަކަށް އިޝާރާތް ކުރައްވާ ރައީސް ވަނީ، ވަގުތު ފާއިތުނުވަނީސް މިހާރު ހިނގާ ނުރަނގަޅު މަގު ދޫކޮށް، އިޞްލާޙުގެ މަގު ޚިޔާރުކުރުމަށް ގޮވާލައްވާފައެވެ. އަދި އެކަހެރިވުމާއި ވަކިވެގަތުމުގެ ޢަމަލުތައް ދޫކޮށް، އިޖުތިމާޢީ މިންގަނޑުގެ ތެރެއަށް ވަނުމަށް ސަމާލުކަންދިނުމަށް ވެސް ރައީސް ވަނީ ގޮވާލައްވާފައެވެ.
ރައީސް ވިދާޅުވީ އެންމެންނަކީ ވެސް މި ޤައުމުގެ ރައްޔިތުން ކަމަށާއި، އެއްވެސް ރައްޔިތަކަށް ދެރަގޮތެއް ވުމަކީ، އެމަނިކުފާނު އެދިވަޑައިގަންނަވާ ގޮތެއް ނޫން ކަމަށެވެ. އަދި އިޞްލާޙުގެ މަގު ޚިޔާރު ކުރުމުން، ދެ ދުނިޔޭގައިވެސް ލިބޭނީ ކާމިޔާބާއި ބާއްޖަވެރިކަން ކަމަށް ރައީސް ވިދާޅުވިއެވެ.
ރައީސް ވިދާޅުވީ އެއްބައިވަންތަކަމުގެ ދުވަހެއް ފާހަގަކުރާއިރު، މިއަދު އެއްބައިވާންޖެހިފައި މިވަނީ، މިފަދަ ކަންކަމާ ދެކޮޅަށް ކަމަށެވެ. އަދި އެންމެން އެއް ޢަޒުމެއްގައި، އެއް ރޫޙެއްގައި މަސައްކަތް ކުރަންވީ، މި މައްސަލަތައް ޙައްލުކުރަން ކަމަށް ރައީސް ވިދާޅުވިއެވެ. އަދި މިއީ އެންމެންގެ ޤައުމު ކަމަށާއި، ދިރިއުޅެން އޮތް ފަސްގަނޑަކީ މިއީ ކަމަށް ރައީސް ވިދާޅުވިއެވެ. އަދި މިތަނުގެ ހަމަޖެހުމާއި ޞުލްޙައާއި އަމާންކަން ދެމިއޮންނާނީ، އެކަންކަމަށް އިސްކަންދިން މިންވަރަކުން ކަމަށް ރައީސް ވިދާޅުވިއެވެ.
