ސްޓޭޓް ޓްރޭޑިންގ އޮގަނައިޒޭޝަން (އެސްޓީއޯ) ގެ ކޮންސްޓްރަކްޝަން މެޓީރިއަލްސް އިން "ރެނަކޮން" ބްރޭންޑުގެ ގަލާއި އިތުރު 2 ޕްރޮޑަކްޓެއް މާރކެޓަށް ނެރެފިއެވެ.
އަންގާރަ ދުވަހު ހޮޓެލް ޖެންގައި ބޭއްވި ރަސްމިއްޔާތެއްގައި މި ޕްރޮޑަކްޓުތައް ލޯންޗުކޮށްދެއްވީ އެސްޓީއޯގެ ބޯރޑް ޑިރެކްޓަރ އިސްމާއިލް ޖުމައްޔިލް ރަޝީދާއި، ރެނަކޮން ކުންފުނީގެ ޗެއަރމަން ސިލްވާ ސުންދްރަމްއެވެ. އެގޮތުން ރެނަކޮން އޭއޭސީ ގަލުގެ އިތުރުން، މި ގާ ބޭނުންކޮށްގެން އިމާރަތް ކުރުމަށް ބޭނުންކުރެވޭނެ ރެނަކޮން އޭއޭސީ ޖޮއިންޓް މޯޓަރާއި، ރެނަޕްލާސްޓް ރެޑީމިކްސް ޕްލާސްޓަރވެސް ވަނީ ލޯންޗުކޮށްފައެވެ.
މި ޕްރޮޑަކްޓްތަކާއި ގުޅޭގޮތުން އެސްޓީއޯގެ ޖެނެރަލް މެނޭޖަރ އަބްދުލް ވާޙިދު މޫސާ ވިދާޅުވީ، އެސްޓީއޯއިން ލޯންޗުކުރި ރެނަކޮން އޭއޭސީ ގަލަކީ ސައުންޑް ޕްރޫފް އަދި މުޅި އިމާރާތުގެ ބުރަދަން ލުއިކޮށްދޭ ތިމާވެއްޓާވެސް ރައްޓެހި ގަލެއް ކަމަށާއި، ލޯންޗު ކުރެވުނު "ސޮލިއުޝަން" ތަކަކީ އިމާރަތް ކުރުމުގެ ސިނާއަތުގައި މިހާރު ލިބެންހުރި އެންމެ ކޮލިޓީ ރަނގަޅު ސޮލިއުޝަންތައް ކަމަށެވެ.
މި ރަސްމިއްޔާތުގައި ރެނަކޮންގެ ސީއީއޯ ސުރޭޝް ކުމާރުވެސް ބައިވެރިވެ ވަޑައިގެންފައިވެއެވެ.
އެސްޓީއޯއިން 1988 ވަނަ އަހަރު ކޮންސްޓްރަކްޝަން ސެގްމެންޓުގެ ވިޔަފާރިއަށް ގުޅުނު ފަހުން، މިހާތަނަށް އައިއިރު އެ ވިޔަފާރި ވަނީ ވަރަށް ބޮޑަށް ފުޅާކޮށްފައެވެ. އެގޮތުން އިމާރަތް ކުރުމަށް ބޭނުންވާ މުހިއްމު މެޓީރިއަލްތައް ހެޔޮ އަގުތަކުގައި އެސްޓީއޯއިން ދަނީ މާކެޓަށް ނެރެމުންނެވެ.
