ހުޅުމާލޭގައި ތޫނުއެއްޗަކުން ހަމަލާދީ މީހަކު މަރާލައިފިއެވެ.

ފުލުހުން ބުނީ މީހަކު ވެއްޓިފައި އޮތް ކަމުގެ ރިޕޯޓެއް ބުދަ ދުވަހުގެރޭ 9:07 ހާއިރު ފުލުހުންނަށް ލިބިގެން އެތަނަށް ދިޔައިރު އެމީހާ އެމްބިއުލާންސްގައި ހުޅުމާލެ ހޮސްޕިޓަލަށް ގެންގޮސްފައިވާ ކަމަށެވެ. އަދި އެމީހާ ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށް ހޮސްޕިޓަލުން މައުލޫމާތު ދީފައިވާ ކަމަށް ފުލުހުން ބުނެއެވެ.

މަރާލާފައިވަނީ އުމުރުން 59 އަހަރުގެ ދިވެހި ފިރިހެނެކެވެ.

މައުލޫމާތު ލިބޭގޮތުގައި ތޫނު އެއްޗަކުން ހަމަލާދީ މަރާލާފައިވަނީ ޓެކްސީ ޑްރައިވަރެކެވެ. އަދި އޭނާ އަށް ހަމަލާދިނީ ގްރޫޕަކުން ކަމަށް ވެސް މައުލޫމާތު ލިބެއެވެ.

ފުލުހުން ބުނީ މި މައްސަލަ އިތުރަށް ތަހުޤީޤްކުރަމުންނެވެ.