މާލޭގައި ހުރި ގުދަންތައް ތިލަފުއްޓަށް ބަދަލުކުރެވުމުން ބާޒާރުން މުދަލުގެ އަގު މަދުވެގެން 15 އިންސައްތައަށް ތިރިވާނެ ކަމަށް ގްރޭޓަރ މާލޭ އިންޑަސްޓްރިއަލް ޒޯން ލިމިޓެޑް ގެ މެނޭޖިންގ ޑިރެކްޓަރ އިބްރާހިމް ރަޝީދު އަބޫބަކުރު (އިބޫ) ވިދާޅުވެއްޖެއެވެ.
އަންގާރަ ދުވަހުގެރޭ ރާއްޖެޓީވީގެ "ފަލަސުރުޚީ" ޕްރޮގްރާމުގައި ވާހަކަ ދައްކަވަމުން އިބޫ ވިދާޅުވީ، ގުދަންތައް މާލޭގައި ގިނަވެ ތޮއްޖެހުމުގެ މައްސަލަ ކުރިއަށް އޮތް ދެ އަހަރު ނިމިގެންދާއިރު މުޅިން ހައްލު ވެގެންދާނެ ކަމަށް ބެލެވޭ ކަަމަށެވެ. އެގޮތުން ތިލަފުއްޓާއި، ގުޅިފަޅާއި، މާލެއާއި، ވިލިނގިލި ހިމެނޭ ގޮތަށް ގުޅާލެވޭ ބްރިޖުގެ މަސައްކަތުގެ ފަންޑު ހަމަޖައްސައިދޭ ފަރާތުން މިވަގުތުވެސް ރާއްޖޭގައި ވަޑައިގެން އުޅުއްވާ ކަމަށާއި، ފަންޑު ހަމަޖެހިގެންދާނެ ކަމަށް އޭނާ ވިދާޅުވިއެވެ.
އިބޫ އިތުރަށް ވިދާޅުވީ، މާލޭގައި ހުރި ގުދަންތައް ތިލަފުއްޓަށް ބަދަލުކުރެވުމުން ބާޒާރުން މުދަލުގެ އަގު މަދުވެގެން 15 އިންސައްތައަށް ތިރިވާނެ ކަމަށް ބެލެވޭ ކަމަށެވެ.
ވިޔަފާރި ކުރަނީ އެންމެ ބޮޑު ފައިދާ އޭގެން ހޯދުމަށްޓަކައި، ތިލަފުށިން އަޅުގަނޑުމެން ދެ ރުފިޔާ ތިރީސް ލާރިއަށް 3 ރުފިޔާ 4 ރުފިޔާ ނުވަތަ 5 ރުފިޔާއަށްވެސް އަކަފޫޓެއް ދޫކޮށްލެވިއްޖެނަމަ މާލޭގައި ހުރި ގުދަންތައް ފާލަމަކުން މާލެއާއި ތިލަފުއްޓާ ގުޅާލެވުނީމައި ގުދަންތައް ތިލަފުއްޓަށް ބަދަލުވީމައި ބާޒާރުން މުދަލުގެ އަގު އެންމެ ގޯސް ތަނުންވެސް 15 ޕަސެންޓު މުދަލުގެ އަގު ތިރިވެގެން އަންނާނެ،ޖީއެމްއައިޒެޑްގެ މެނޭޖިންގ ޑިރެކްޓަރ އިބްރާހިމް ރަޝީދު އަބޫބަކުރު
އިބޫ އެހެން ވިދާޅުވެފައިވާއިރު، މާލޭގެ ތޮއްޖެހުން ކުޑަ ކުރުމަށް ގުޅީފަޅުން ބިން ހިއްކުމަށް 17 އޮކްޓޯބަރު 2019 ގައި ބަޔަކާއި ހަވާލުކޮށްފައިވެއެވެ.
މި ޕްރޮޖެކްޓުގެ ސަބަބުން މާލޭގެ އިންޓީރިއަރ ބަދަލުކޮށް މާލެ ތޮއްޖެހުމުގެ މައްސަލައަށް ހައްލެއް ގެނެވި ރައީސުުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ވައުދުފުޅާއި އެއްގޮތަށް، މާލެ ހިތް ފަސޭހަ ތަނަކަށް ހެދުމަށް ވަރަށް ބޮޑު ކުރިއެރުމެއް ލިބިގެންދާނެކަމަށް މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ އިންވެސް ބުނެފައިވެއެވެ.
