މުދައްރިސުންގެ މުސާރަ އާއި މަސައްކަތުގެ މާހައުލު އޮތްގޮތުން މުދައްރިސް ކަމަކީ މިހާރު އެހާ ހިތްގައިމު މަސައްކަތެއް ނޫންކަމަށާއި އެހެންކަމުން ހާލަތު ބަދަލުކުރުމަށް މަސައްކަތްތަކެއް ކުރައްވަމުން ގެންދަވާކަމަށް އެޑިޔުކޭޝަން މިނިސްޓަރ ޑރ އައިޝަތު އަލީ ވިދާޅުވެއްޖެ އެވެ.
ދާންދޫ ދާއިރާގެ މެމްބަރ ޔަޢުޤޫބް އަބްދުﷲ މުދައްރިސު ކަމަށް ސްކޫލް ނިންމާ މޮޅެތި ދަރިވަރުން ނުނިކުންނާތީ އެކަމުގެ ސަބަބާއި އެކަމަށް ހައްލު ހޯދުމަށް މިނިސްޓްރީން ކުރައްވަމުން ގެންދަވާ މަސައްކަތްތަކާއި ގުޅޭގޮތުން ދެންނެވި ސުވާލަށް ޖަވާބު ދެއްވަމުން މިނިސްޓަރ ވިދާޅުވީ ތައުލީމީ ދާއިރާގެ ކަންކަން ބައްޓަންވެފައިވާ ގޮތުން މުދައްރިސުންނަށް ގިނަ ވަގުތުތަކެއް ހޭދަކުރަންޖެހިފައިވަނީ ސްކޫލްތަކުގައި ކަމަށެވެ. އަދި މުދައްރިސުންނަށް ގިނަ ޕްރެޝަރތަކެއް ދިމާވަމުންދާކަން މިނިސްޓަރ ފާހަގަކުރެއްވި އެވެ.
އެގޮތުން ބެލެނިވެރިންނާއި ސްކޫލް މެނޭޖްމެންޓާއި މިނިސްޓްރީންވެސް މުދައްރިސުންނަށް ގިނަ ޕްރެޝަރތަކެއް ދިމާވަމުންދާ ކަމަށް މިނިސްޓަރ ވިދާޅުވި އެވެ. އަދި އެދެވޭ ތަމްރީނު ތަކެއް މުދައްރިސުކަމަށް އަލަށް އަންނަ ކުދިންނަށާއި މުދައްރިސްކަމުގައި މިހާރު ތިބި މީހުންނަށްވެސް ނުދެވޭކަމަށް މިނިސްޓަރ ވިދާޅުވި އެވެ. ކިޔެވުމަށްވެސް މުދައްރިސުން ކުރަންޖެހޭ މަސައްކަތަކީ ބުރަ މަސައްކަތެއްކަން ފާހަގަކުރައްވާ މިނިސްޓަރ ވިދާޅުވީ ރަށުގައި އާއިލާ ކައިރީގައި ތިބެގެން ކިޔެވުމުގެ ފުރުސަތު މުދައްރިސުންނަށް ނެތްކަމަށެވެ.
އަދި މުދައްރިސުންނާ ދޭތެރޭ މުޖުތަމަޢު ދެކޭގޮތްވެސް މިހާރު ބަދަލު ވެފައިވާކަމަށް މިނިސްޓަރ ވިދާޅުވި އެވެ. ކުރިން ގަދަރުވެރި މަސައްކަތެއްގެ ގޮތުގައި މުދައްރިސްކަން ދެކޭ ކަމަށާއި ނަމަވެސް މިހާރު އެގޮތަށް ނުދެކޭކަމަށް މިނިސްޓަރ ވިދާޅުވި އެވެ.
މިކަންކަން ހައްލުކުރުމަށް މިނިސްޓްރީން މިހާރު މަސައްކަތްތަކެއް ކުރައްވަމުން ގެންދަވާކަމަށާއި އެގޮތުން ދެ ކަމަކަށް އިސްކަންދެއްވައިގެން އެ މަސައްކަތް ކުރައްވާކަމަށް މިނިސްޓަރ ވިދާޅުވި އެވެ.
އެގޮތުން ފުރަތަމަ ކަމެއްގެ ގޮތުގައި އަޅުގަނޑު ފާހަގަކުރަނީ އާ ކުދިން މިދާއިރާއަށް ވެއްދުން. ދެވަނަ ކަމަކީ މިހާރު ތިއްބެވި މުދައްރިސުން ވަޒީފާގެ ދެމިތިބެވޭނެ ގޮތްގޮތަށް ކަންކަން ހަމަޖެއްސުން. ސްކޫލް ނިންމާ ދަރިވަރުން މިދާއިރާއަށް ޝައުގުވެރި ކުރުމަށްޓަކައި މިހާރު މަސައްކަތްތަކެއް ރޭވިފައި އެބަހުރި. އެއްކަމަކީ އޭ ލެވެލް ކުދިންނަށް ޓާގެޓްކޮށްގެން އަޅުގަނޑުމެން ހިންގަން ގަސްތުކޮށްފައި އޮތް ޕްރޮގްރާމް. މި ޕްރޮގްރާމް އޭ ލެވެލް ނިންމާ ކުދިންނަށް އަޅުގަނޑުމެން ހިންގާނަން.އެޑިޔުކޭޝަން މިނިސްޓަރ ޑރ އައިޝަތު އަލީ
މީގެއިތުރުން މިނިސްޓަރ ވިދާޅުވީ މުދައްރިސުންގެ ގަދަރު ދަރިވަރުންގެ ކުރިމަތީގައި މަތި ކުރުމަށް ކެމްޕޭނެއް ފައްޓަވާފައި ވާކަމަށެވެ. އޭގެ ފުރަތަމަ ޕްރޮގްރާމް މިއަހަރުގެ މުދައްރިސުންގެ ދުވަހު ހިންގާފައިވާކަމަށް މިނިސްޓަރ ވިދާޅުވި އެެވެ.
އަޅުގަނޑުމެން މިފަހަރު މުދައްރިސުންގެ ދުވަހު އިހުގެ ޓީޗަރުން، ކުރީގައި މުދައްރިސްކަން ކޮށްފައި ތިބި ޓީޗަރުން، މުޖުތަމަޢުގެ ގަދަރު ލިބިފައި ތިބި ޓީޗަރުން ސްކޫލްތަކަށް ގެންދިޔައިން. ގެންގޮސް އެބޭފުޅުންގެ ތަޖުރިބާ ކުދިންނާ ހިއްސާކުރިން. އެގޮތުންވެސް އަޅުގަނޑުމެން މިބަލަނީ މުދައްރިސްކަމަށް ދަރިވަރުން ލޯބި ޖެއްސޭތޯ.އެޑިޔުކޭޝަން މިނިސްޓަރ ޑރ އައިޝަތު އަލީ
މިނިސްޓަރ ވިދާޅުވީ މިހާރު ތައްޔާރުކޮށްފައިވާ ޕްރޮގްރާމްގެ ތެރެއިން އޭ ލެވެލް ނިންމާ ދަރިވަރުން ސްކޫލްތަކަށް ގެންގޮސް މުދައްރިސުންނާއި ގުޅުވައިގެން ޕްރޮގްރާމްތަކެއް ހިންގުންކަމަށެވެ. އެ ޕްރޮގްރާމްގެ ޒަރީޢާއިން މިދާއިރާއަށް އާ ކުދިން އަންނާނެ ކަމަށް އުންމީދުކުރައްވާ ކަމަށް މިނިސްޓަރ ވިދާޅުވި އެވެ.
މީގެއިތުރުން މިނިސްޓަރ ވިދާޅުވީ މުދައްރިސުން މަސައްކަތް ކުރާ މާހައުލަކީ މަސައްކަތް ކުރުމަށް އެކަށޭނެ މާހައުލަކަށް ހެދުމަށް މަސައްކަތްތަކެއް ކުރައްވަމުން ގެންދަވާ ކަމަށެވެ. އެގޮތުން ސިންގަލް ސެޝަން ސްކޫލްތަކަކަށް ހުރިހާ ސްކޫލްތަކެއް ބަދަލުކޮށްގެން އެފަދަ މާހައުލެއް ގާއިމުކުރެވިގެން ދާނެކަމަށް މިނިސްޓަރ ވިދާޅުވި އެވެ. އެގޮތުން މިސެމިސްޓަރ ގައި 22 ސްކޫލެއްގައި ސިންގަލް ސެޝަން ސްކޫލްތައް ޕައިލެޓް ކޮށްފައިވާ ކަމަށާއި އެކަމަކީ ކާމިޔާބު ކަމެއްގެ ގޮތުގައި ފާހަގަވެގެން ގޮސްފައިވާކަމަށް މިނިސްޓަރ ވިދާޅުވި އެވެ.
މީގެއިތުރުން ސްކޫލްތަކުގައި ޓީޗަރުންނަށް ބޭނުންވާ ވަސީލަތްތައް ގާއިމުކުރުމުގެ މަސައްކަތް ކުރައްވަމުން ގެންދަވާކަމަށް މިނިސްޓަރ ވިދާޅުވި އެވެ. އެގޮތުން ސްޓާފް ރޫމްތަކުގެ ހާލަތު ރަނގަޅު ކުރުމަށް މަސައްކަތް ކުރައްވާކަމަށް މިނިސްޓަރ ވިދާޅުވި އެވެ.
