ކުރީގެ ރައީސް ޢަބްދުﷲ ޔާމީނަށް ކުރެވޭ މަނީލޯންޑްރިންގެ ޝަރީޢަތް އިންސާފުވެރިވެދާނެ ކަމަށް ޤަބޫލުނުކުރެވޭނެ ކަމަށް ވިދާޅުވެ، އެމަނިކުފާނުގެ ވަކީލުންގެ ޓީމުން ކަންބޮޑުވުން ފާޅުކޮށްފިއެވެ.
ރައީސް ޔާމީނުގެ މައްޗަށް މަނީ ލޯންޑަރިންގެ ދަޢުވާ އުފުލާފައި ވަނީ މޯލްޑިވްސް މަރކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ބޮޑު ޚިޔާނާތުގެ ފައިސާ އެސްއެފްގެ އެކައުންޓެއް މެދުވެރިކޮށް އެމަނިކުފާނުގެ އަމިއްލަފުޅު އިސްލާމިކް ބޭންކް އެކައުންޓަށް ޖަމާކޮށްފައި ވާތީއެވެ.
އެ މައްސަލައިގެ ޙުކުމް އިއްވުމަށް އަންގާރަ ދުވަހު މެންދުރު ކްރިމިނަލް ކޯޓުގައި އެކެއް ޖެހިއިރު ތާވާލު ކުރި ޝަރީޢަތް ކެންސަލް ކޮށްފައިވަނީ މައްސަލަ ބައްލަވާ ކްރިމިނަލް ކޯޓުގެ އިސް ޤާޟީ އަޙްމަދު ހައިލަމް ސަސްޕެންޑް ކުރުމާއި ގުޅިގެންނެވެ.
ރައީސް ޔާމީނުގެ ވަކީލުންގެ ޓީމުން އަންގާރަ ދުވަހު މާގިރި ހޮޓަލުގައި ބޭއްވި ނޫސްކޮންފަރެންސް ގައި ވާހަކަ ދައްކަވަމުން އެމަނިކުފާނުގެ ވަކީލުންގެ ޓީމުގައި ހިމެނިވަޑައިގަންނަވާ ކުރީގެ ނައިބު ރައީސް ޑރ. މުޙައްމަދު ޖަމީލް އަޙްމަދު ވިދާޅުވީ، ޝަރީޢަތް ކެންސަލް ކުރިކަން ވެސް ނާންގާ ކަމަށާއި، އެކަން އެނގިވަޑައިގަތީ މީޑިއާތަކުން ކަމަށެވެ.
ޝަރީޢަތް ކުރިއަށް ގެންދާނެ ގޮތް އަދި އަންގާފައިނުވާ ކަމަށް ވިދާޅުވިއެވެ. އެ މައްސަލަ ބައްލަވާ ޤާޟީ ހައިލަމް ސަސްޕެންޑް ކޮށްފައިވާތީ އެކަމާއި ގުޅިގެން ޑރ. ޖަމީލް ވިދާޅުވީ، ޖުޑީޝަލް ސަރވީސް ކޮމިޝަން (ޖޭއެސްސީ) އަށް އެ ކޮމިޝަނުގެ ޙައިޞިއްޔަތާއި، އެ ކޮމިޝަނުން އަދާކުރަންޖެހޭ މަސްއޫލިއްޔަތު އޮޅުވާލާފައިވާ ކަމަށެވެ. ޖޭއެސްސީގެ ފަރާތުން ކަންތައް ކުރަނީ އެ ކޮމިޝަނުގެ މަފްޙޫމް ގެއްލޭ ގޮތަށްކަން ފާހަގަކުރައްވަމުން ޑރ. ޖަމީލް ވިދާޅުވީ، ޖެހިލުމެއްނެތި ފަަނޑިޔާރުކަން ކުރުމުގެ މާޙައުލެއް ޖޭއެސްސީގެ ޢަމަލުތައް ހުރި ގޮތުން ނެތް ކަމަށެވެ.
އަޅުގަނޑުމެންނަށް މިއަދު ގަބޫލެއް ނުކުރެވޭ ދިވެހިރާއްޖޭގެ ފަނޑިޔާރުންގެ ކަންތައް ބެލުން މަތިވެފައިވާ ޖޭއެސްސީގެ އަމަލުތައް ހުރި ގޮތުން ރައީސް ޔާމީނަށް އިންސާފުވެރި ޝަރީޔަތެއް ލިބިދާނެ ކަމާއި މެދު އަޅުގަނޑުމެންނަށް ޝައްކުކުރަން. އަޅުގަނޑުމެންނަށް ގަބޫލެއް ނުކުރެވޭ.ޑރ. ޖަމީލް ~ ރައީސް ޔާމިންގެ ވަކީލު~
ސަރުކާރު ގެނައުމަށްޓަކައި މަސައްކަތް ކުރެއްވި ޖުމްހޫރީ ޕާޓީއަށް ނިޞްބަތްވެ ވަޑައިގަންނަވާ ޖަމީލް ވިދާޅުވީ، ޖޭއެސްސީން ކަންތައް ކުރަމުންދާ ގޮތަކީ ދުނިޔޭގެ އެއްވެސް ތަނެއްގެ މިނިވަން މުސްތަޤިއްލު ޝަރުޢީ ނިޒާމަކުން ފެނިގެން ނުދާނެ ހިތާމާވެރި މަންޒަރެއް ކަމަށެވެ.
ޔާމީނުގެ ޝަރީޢަތަށް ކުޑަތަން ވެފައި އޮއްވާ ޤާޟީ ހައިލަމް ސަަސްޕެންޑު ކުރުމަކީ ކޮންމެ މިންގަނޑަކުން ބެލި ކަމުގައިވިޔަސް ފަނޑިޔާރުންނަށް ނޫފުޒު ފޯރުވުން ކަމަށް ޑރ.ޖަމީލް ވަނީ ސިފަކުރައްވާފައެވެ.
އަދި މި އަމަލުގެ ސަބަބުން ހަގީގަތުގައި މުޅި ރާއްޖޭގެ އެއްވެސް ގޮތަކަށް ސަރުކާރަށް އިދިކޮޅަށް މަސައްކަތް ކުރާ ސިޔާސީ އިދިކޮޅު ފަރާތްތަކުން ހިޔާލު ތަފާތުވާ ފަރާތްތަކަށް އިންސާފުވެރި ޝަރިޔަތް ލިބިދާނެ ކަމާއި މެދުގައި ޝައްކު އުފެދޭޑރ. މުހައްމަދު ޖަމީލް ~ ކުރީގެ ނައިބް ރައީސް ~
ޑރ. ޖަމީލް ވިދާޅުވީ، ޙުކުމް އަންނާނެ ގޮތަކާއި މެދު ކަންބޮޑު ނުވާ ކަމަށެވެ. އަދި ޖޭއެސްސީން ޤާނޫނާއި އެއްގޮތަށް މަސައްކަތް ކުރިޔަށް ގެންދިއުމަށް އޭނާ ވަނީ ގޮވާލާފައެވެ.
