ކްރިމިނަލް ކޯޓުގެ އިސްގާޒީ އަހްމަދު ހައިލަމް ސަސްޕެންޑްކޮށް، އަންގާރަ ދުވަހަށް ތާވަލުކޮށްފައި އޮތް ރައީސް ޔާމިންގެ ހުކުމް އިއްވުމުގެ ޝަރީއަތުގެ މަޖިލިސް ފަސްކޮށްފިއެވެ.
ހައިލަމް ސަސްޕެންޑްކުރި މައްސަލައިގައި ޖުޑީޝަލް ސަރވިސް ކޮމިޝަނުން ނެރުނު ނޫސް ބަޔާނެއްގައި ބުނެފައިވަނީ، ހައިލަމް ސަސްޕެންޑްކުރެވުނީ ހުށައެޅިފައިވާ ސުލޫކީ މައްސަލައިގެ ތަހުގީގު ކޮމިޓީއަށް ހާޒިރުވާން އުޒުރުވެރުވެވަޑައިގަތުމުން ކަމަށެވެ.
ޖޭއެސްސީން ބުނީ، ހާޒިރު ނުވެވޭނެ ކަމަށް ބަޔާންކުރައްވާ ހައިލަމް ސިޓީއެއް ފޮނުއްވާފައިވާއިރު، އެ ސިޓީގައި ވަނީ ހޯމަ ދުވަހުގެ ރޭ އާންމުކުރެއްވި ބަޔާނުގައި ޖޭއެސްސީއަށް ދޭން ބޭނުންވާ ހުރިހާ މައުލޫމާތެއް ހިމަނާފައިވާނެ ކަމަށެވެ. އަދި ހުށައެޅިފައިވާ މައްސަލައާއި ގުޅޭގޮތުން ދޭން ބޭނުންވާ ހުރިހާ މައުލޫމާތެއް އެ ބަޔާނުގައި ހިމަނާފައިވާނެ ކަމަށް ވެސް ސިޓީގައި ވެއެވެ.
ޖޭއެސްސީއިން ވަނީ އެ ބަޔާނަކީ އިސްގާޒީ ހައިލަމްއާ ގުޅިގެން މިހާރު ބަލަމުންދާ ސުލޫކީ މައްސަލައާއި ގުޅޭގޮތުން އެ ކޮމިޝަނަށް ހޯދުނު ބަސްކަމަށް ބަލައިގަނެފައެވެ.
އިސްގާޒީ ހައިލަމް ސަސްޕެންޑްކޮށްފައިވަނީ، މައްސަލައިގެ ބާވަތުން ޝަރުއީ ދާއިރާގެ އިތުބާރު ގެއްލިދާނެ ޒާތުގެ މައްސަލައަކަށް ވާތީކަމަށް ޖޭއެސްސީއިން ވަނީ ނިންމާފައެވެ. ހައިލަމް ސަސްޕެންޑްކޮށްފައިވަނީ، 60 ދުވަހަށް ވުރެ ދިގުނޫން މުއްދަތަކަށެވެ. އެ މުއްދަތުގެ ތެރޭގައި ވަޒީފާގެ ހުރިހާ މަސްއޫލިއްޔަތަކުން އެކަހެރިކޮށް، ވަޒީފާއަށް ނުނިކުމެ މަޑުކުރުމަށް ގާޒީ ހައިލަމްއަށް ވަނީ އަންގާފައެވެ.
އިސްގާޒީ ހައިލަމްއާ ގުޅޭގޮތުން ޖޭއެސްސީއިން ބަލަން ފަށާފައިވާ ސުލޫކީ މައްސަލައަކީ، ނަސްރުގެ ދުވަހުގެ ތަހުނިޔާ ރައްދުކޮށް ކްރިމިނަލް ކޯޓުގައި މަސައްކަތްކުރާ މުވައްޒަފުން އުޅޭ ވައިބަރ ގްރޫޕެއްގައި ޝެއަރކުރެއްވި ކުރެހުމެއްގެ ފޮޓޯއަކާއި ގުޅިގެންނެވެ.
އެ ފޮޓޯއިން ފެނިގެންދަނީ ނޮވެމްބަރު ތިނެއްގެ ހަމަލާގައި ޝަހީދުވެވަޑައިގެންނެވި ޝަހީދު ހުސައިން އާދަމް، އެ ދުވަހުގެ ހަމަލާގައި އިސްކޮށް އުޅުނު ބައެއް ފަރާތްތައް ޗެންޗޭނު ޖަހައިގެން ގެންދާއިރު، އެ ސަފުގެ ފަހަތުގައި ރައީސް އިބްރާހިމް މުހައްމަދު ސޯލިހު އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ތިއްބަވާ މަންޒަރެވެ.