ރާއްޖޭގެ އިޤްތިޞާދުގެ މިހާރުގެ ޙާލަތަށް ބަލާއިރު، ކެޕިޓަލް މާކެޓް ތަރައްޤީކުރުމަކީ، ރާއްޖޭގެ މާލީ ދާއިރާ އިތުރަށް ފުޅާކޮށް، ރާއްޖޭގެ އިޤްތިޞާދު މިއަށް ވުރެ މަތީ ހަރުފަތަށް ގެންދިޔުމަށްޓަކައި ވަރަށް ބޭނުންތެރި ކަމެއް ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ބުރާސްފަތި ދުވަހު ބަނޑޮސް އައިލެންޑް ރިސޯޓުގައި އޮތް ކެޕިޓަލް މަރކެޓް ފޯރަމް އިފްތިތާހުކޮށްދެއްވާ ވާހަކަފުޅު ދައްކަވަމުން ރައީސް ސޯލިހު ވިދާޅުވީ، ކެޕިޓަލް މަރކެޓަކީ ރާއްޖޭގެ އިގްތިސާދަށް ހަކަތަ ފޯރުކޮށްދޭ މައި އިންޖީނު ކަމަށެވެ.
ފަރުދުންގެ ފުދުންތެރިކަމާއި ތިޔާގިކަމަކީ، މުޖުތަމައެއްގެ ހަމަޖެހުމާއި ގުޅިލާމެހިފައިވާ ކަންކަން ކަމަށް ފާހަގަކުރައްވާ ރައީސް ވިދާޅުވީ، އެހެންކަމުން ގައުމެއްގެ ހަމަޖެހުން ގާއިމްކުރުމުގައި، ކެޕިޓަލް މަރކެޓަށް މުހިންމު ދައުރެއް އަދާކުރެވިދާނެ ކަމަށެވެ.
އިޖުތިމާޢީ ހަމަޖެހުން ޤާއިމުކުރުމުގައި، ކެޕިޓަލް މާކެޓަށް ވަރަށް މުހިންމު ދައުރެއް އަދާކުރެވިދާނެ. ކޮންމެ މުޖުތަމަޢެއްގެވެސް ހަމަޖެހުމާއި އަމާންކަން ބިނާވެފައި މި އޮންނަނީ، އެ މުޖުތަމަޢެއްގައި ދިރިއުޅޭ ފަރުދުންގެ ފުދުންތެރިކަމާއި ތިޔާގިކަމުގެ މައްޗަށް.ރައީސް އިބްރާހިމް މުހައްމަދު ސޯލިހު
ގައުމީ ތަރައްގީއާ ކެޕިޓަލް މަރކެޓާ އޮތް ގުޅުމުގެ ވާހަކައަށް އަލިއަޅުއްވާލަމުން ރައީސް ވިދާޅުވީ، ތަރައްގީގެ މަޝްރޫއުތަކުގައި އަމަލީގޮތުން ކޮންމެ ފަރުދަކަށް ބައިވެރިނުވެވުނު ކަމުގައިވިޔަސް، ކެޕިޓަލް މަރކެޓް މެދުވެރިކޮށް ތަރައްގީގެ މަޝްރޫއުތަކުގައި ކޮންމެ ފަރުދަކަށްވެސް ބައިވެރިވުމުގެ ފުރުސަތު އެބައޮތް ކަމަށެވެ. އަދި ގައުމީ ސިނާއަތްތަކުގައި ރައްޔިތުންގެ ބައިވެރިވުން އިތުރުކުރުމުގައި ކެޕިޓަލް މަރކެޓްގެ ހިއްސާ ބޮޑުކަމަށް ރައީސް ފާހަގަކުރެއްވިއެވެ.
ކެޕިޓަލް މާކެޓް މެދުވެރިކޮށް، ތަރައްޤީގެ މަޝްރޫޢުތަކުގައި ބައިވެރިވުމަކީ، ކޮންމެ ފަރުދަކަށްވެސް އޮތް ފުރުޞަތެއް. ޤައުމީ ޞިނާޢަތްތަކުގައި، ރައްޔިތުންގެ ބައިވެރިވުން އިތުރުކުރުމުގައި، ކެޕިޓަލް މާކެޓުގެ ޙިއްޞާ ވަރަށް ބޮޑު.ރައީސް އިބްރާހިމް މުހައްމަދު ސޯލިހު
ރާއްޖޭގެ އިގްތިސާދުގެ ބޮޑު އިންސައްތައެއް ހިއްސާކުރާ ކުދި އަދި މެދު ފަންތީގެ ވިޔަފާރިތަކަށް ދިމާވެފައިވާ އެންމެ ބޮޑު ގޮންޖެހުމަކީ، އެވިޔަފާރިތައް ކުރިއަރުވާނެ މާލީ އެހީ ބޭންކިންގ ނިޒާމުގެ ތެރެއިން ލިބެން ނެތުން ކަމަށްވެސް ރައީސް ވިދާޅުވިއެވެ. ރައީސް ވިދާޅުވި ގޮތުގައި، މިކަމަށް އޮތް އެންމެ ރަނގަޅު ހައްލަކީވެސް ކެޕިޓަލް މަރކެޓް އެވެ. އަދި މި ޒާތުގެ ވިޔަފާރިތައް ފެށުމަށާއި، ފައިސާގެ އެހީ ފޯރުކޮށްދޭ ވަސީލަތެއްގެ ގޮތުގައި ކެޕިޓަލް މަރކެޓް ހެދިދާނެ ކަމަށް ރައީސް ވިދާޅުވިއެވެ.
ދުނިޔޭގެ އެހެން ޤައުމުތަކުގައި ކަންކުރާ އުޞޫލަށް ބަލާއިރު، ރާއްޖޭގެ މި މައްސަލައަށްވެސް އޮތް އެންމެ ރަނގަޅު ޙައްލެއް ކަމަށް އަޅުގަނޑަށް ގަބޫލުކުރެވެނީ، ކެޕިޓަލް މާކެޓް. ރާއްޖޭގައި ވިޔަފާރިތައް ފެށުމަށާއި، ވިޔަފާރިތައް ކުރިއަރުވަން ބޭނުންވާ ފައިސާގެ އެހީތެރިކަން ފޯރުކޮށްދޭ، އިތުރު ވަސީލަތެއްގެ ގޮތުގައި ކެޕިޓަލް މާކެޓް ހެދިދާނެ.ރައީސް އިބްރާހިމް މުހައްމަދު ސޯލިހު
މިކަމަށް އިތުރަށް ވާހަކަފުޅު ދައްކަވަމުން ރައީސް ވިދާޅުވީ، މިހާރުވެސް ކުދި އަދި މެދު ފަންތީގެ ވިޔަފާރިތަކަށް އެހީވުމުގެ ގޮތުން ސްކީމްތަކެއް ސަރުކާރުން ފަށާފައިވާއިރު، ކެޕިޓަލް މަރކެޓް ނިޒާމުގެ ތެރެއިން މި ސްކީމްތައް އިތުރަށް ފުޅާކުރުމަކީ ވަރަށް ބޭނުންތެރި ކަމެއް ކަމަށެވެ. މިކަމަށް ބޭޏުންވަނީ ގިނަ އިންވެސްޓަރުންގެ ބައިވެރިވުން ކަމަށް ރައީސް ވިދާޅުވިއެވެ.
ރައީސް ސޯލިހުގެ ސަރުކާރުން ކުދި އަދި މެދު ފަންތީގެ ވިޔަފާރިތަކަށް އެހީވުމުގެ ގޮތުން އެސްއެމްއީ ބޭންކެއް އުފައްދާފައެވެ. އެގޮތުން އިކޮނޮމިކް މިނިސްޓްރީގެ ދަށުން ހިންގާ އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން ރައީސް ސޯލިހު އުފެއްދެވި ކޯޕަރޭޝަންގައި ސަރުކާރުގެ އިތުރުން އައްޑޫ ސިޓީ ކައުންސިލާއި މާލޭ ސިޓީ ކައުންސިލާއި ފުވައްމުލައް ސިޓި ކައުންސިލްގެ ހިއްސާ އޮވެއެވެ. ރައީސް މި ބޭންކް އިފްތިތާހުކޮށްދެއްވީ 18 މާޗް 2019 ވަނަ ދުވަހުއެވެ.
ބަނޑޮސް އައިލެންޑުގައި މިހާރު ކުރިއަށްދާ ކެޕިޓަލް މަރކެޓް ފޯރަމް 2019 އަކީ، ކެޕިޓަލް މަރކެޓަށް ހާއްސަކުރެވިގެން ރާއްޖޭގައި ބާއްވާ ފުރަތަމަ ފޯރަމެވެ. މި ފޯރަމްގެ ޒަރިއްޔާއިން ކެޕިޓަލް މަރކެޓް ކުރިއެރުވުމަށް ދިމާވެފައިވާ ގޮންޖެހުންތައް ދެނެގަނެ، އާންމުންގެ ތެރޭގައި ކެޕިޓަލް މަރކެޓަށް އިންވެސްޓްކުރުމަށް އިތުރަށް ހޭލުންތެރިކުރުވުމުގެ މަގުފަހި ވެގެން ދާނެ ކަމަށް މި ފޯރަމް އިންތިޒާމް ކުރާ ކެޕިޓަލް މަރކެޓް ޑިވެލޮޕްމަންޓް އޮތޯރިޓީއިން ގަބޫލުކުރެއެވެ. މި ފަހަރުގެ ފޯރަމްގެ ޝިއާރަކީ، "އިޖްތިމާއީ ހަމަޖެހުމަށް ކެޕިޓަލް މަރކެޓް" އެވެ.