ވޯލްޑްކަޕް ކޮލިފިކޭޝަނުގައި އަމިއްލަ ދަނޑުގައި ފިލިޕީންސް އަދި ގުއާމާއި ދެކޮޅަށް ކުޅޭ މެޗުގެ ފޯރި ގަދަ ކުރުމުގެ ގޮތުން އަންގާރަ ދުވަހު އެފްއޭއެމްގެ ޓީމާއި ރައްޔިތުންގެ މަޖިލީހުގެ މެމްބަރުންގެ ޓީމު ބައްދަލުކުރި މެޗު ފަސޭހަ ކަމާއެކު އެފްއޭއެމްގެ ޓީމުން ކާމިޔާބުކޮށްފިއެވެ.

މާފަންނު ޓާރފް ގްރައުންޑްގައި ކުޅުނު މި މެޗު އެފްއޭއެމްގެ ޓީމުން ކާމިޔާބުކޮށްފައިވަނީ 10-2 ގެ ނަތީޖާ އަކުންނެވެ.

ރައްޔިތުންގެ މަޖިލީހުގެ މެމްބަރުގެ ޓީމުގައި ގިނަ އަދަދެއްގެ މަޖިލީހުގެ މެމްބަރުން ވަނީ ކުޅެފައެވެ. އަދި އެފްއޭއެމްގެ ޓީމުގައި ނައިބު ރައީސް ފައިސަލް ނަސީމާއި، ގައުމީ ޓީމު ކޮމެޓީ ޗެއާމަން އަދި ޓުއަރިޒަމް މިނިސްޓަރ އަލީ ވަހީދާއި، އެފްއޭއެމް އެކްސްކޯ މެމްބަރުންނާއި، ކުރީގެ ކުޅުންތެރިން ކުޅެފައިވެއެވެ.

ގައުމީ ޓީމު ކޮމެޓީގެ ޗެއާމަން އަލީ ވަހީދު ވިދާޅުވީ މި މެޗުގެ މަގްސަދަކީ ވޯލްޑްކަޕް ކޮލިފިކޭޝަނުގައި އަމިއްލަ ދަނޑުގައި ކުޅޭ ދެމެޗުގެ ފޯރި ގަދަ ކުރުން ކަމަށެވެ. މީގެ އިތުރުން އަލީ ވަހީދު ވިދާޅުވީ ރައްޔިތުންގެ މަޖިލީހުގެ މެމްބަރުން މުޒާހަރާތަކުގައި ނެގި ފޯރީގައި ދަނޑަށް މީހުން ވެއްދުމަށް އެދިވަޑައިގަންނަވައިފައެވެ.

ނައިބު ރައީސް ފައިސަލް ނަސީމު ވިދާޅުވީ އެފްއޭއެމް އާއި ސަރުކާރު މިކުރާ މަސައްކަތުގައި ދަނޑަށް މީހުން ވެއްދުމަށް ރައްޔިތުންގެ މަޖިލީހުގެ މެމްބަރުން މަސައްކަތް ކުރައްވާނެ ކަމުގެ އުންމީދު އެބައޮތް ކަމަށާއި، ފުޓުބޯޅަ އަކީ ދިވެހި ރައްޔިތުންގެ ހިތުގައި އެންމެ ލޯބި އޮތް ކުޅިވަރު ކަމަށެވެ. އަދި ކުރިޔަށް އޮތްދެމެޗުން މޮޅުވާނެ ތަން ފެންނަ ކަމަށް ނައިބު ރައީސް ވަނީ ވިދާޅުވެފައެވެ. މި ކަމުގައި މުޅި ގައުމު އެކަތި ގަނޑަކަށް ވުމަށް ނައިބު ރައީސް ވަނީ ގޮވާލައްވާފައެވެ.

އެފްއޭއެމްގެ ރައީސް ބައްސާމް ވިދާލުވީ ކުރިޔަށް އޮތް ދެމެޗަށް ފޯރި ގެނައުމަށް ކުރާ މަސައްކަތް އަމަލީ ގޮތުން މިއަދު ފަށައިފި ކަމަށާއި އެހެން ކަމުން ގައުމީ ޓީމުގެ ކުޅުންތެރިންނަށް އެ ބޭނުންވާ ސަޕޯޓް ދިނުމަށް އަމިއްލަ ގައުމުގައި ކުޅުމަށް ހަމަޖެހިފައިވާ މެޗަށް ދަނޑަށް ވަނުމަށް ގޮވާލައިފައެވެ.

ވޯލްޑްކަޕް ކޮލިފިކޭޝަނުގައި ފިލިޕީންސް އާއި ދެކޮޅަށް ނޮވެމްބަރު މަހު 14 ގައި ގައުމީ ޓީމު ނިކުންނައިރު، ނޮވެމްބަރު މަހުގެ 19 ވަނަ ދުވަހު ރާއްޖެއިން ނިކުންނާނީ ގުއާމާއި ދެކޮޅަށެވެ.

ކޮލިފިކޭޝަނުގައި ރާއްޖެއިން މިހާތަނަށް ތިން މެޗު ކުޅެފައިވާއިރު މޮޅުވެފައިވަނީ އެންމެ މެޗަކުންނެވެ. އަމިއްލަ ދަނޑުގައި ޗައިނާ އަތުން 5-0 އިން ބަލިވިއިރު ސީރިއާ އަތުން ރާއްޖެ ބަލިވެފައިވަނީ 2-1 ގެ ނަތީޖާ އަކުންނެވެ. ކޮލިފިކޭޝަނުގައި ރާއްޖެއިން މޮޅުވެފައިވަނީ ރަށުން ބޭރުގައި ގުއާމް އަތުން 1-0 ގެ ނަތީޖާ އަކުންނެވެ.

ރާއްޖެ ހިމެނޭ ގްރޫޕްގެ އެއްވަނައިގައި ސީރިއާ ނުވަ ޕޮއިންޓާއެކު އޮތް އިރު ދެވަނައިގައި ޗައިނާ އޮތީ ހަތް ޕޮއިންޓާއެކުގައެވެ. މިގްރޫޕްގެ ތިން ވަނައިގައި ހަތަރު ޕޮއިންޓާއެކު ފިލިޕީންސް އޮތްއިރު ހަތަރުވަނައިގައި ރާއްޖެއިން އޮތީ ތިންޕޮއިންޓާއެކުގައެވެ. އަދި ގްރޫޕްގެ ފުލުގައި ގުއާމް އޮތީ ކުޅުނު ހުރިހާ މެޗަކުން ބަލިވެ ޕޮއިންޓެއް ނުލިބިއެވެ