ޖިންސީ ގޯނާގެ ތުހުމަތުގައި ހައްޔަރުކުރި ގައުމީ ކްރިކެޓް ކޯޗު އާސިފް ޚާންގެ މައްސަލައިގައި ޕާކިސްތާނުގެ އެމްބެސަޑަރ ނުފޫޒު ފޯރުވަމުންދާ ކަމުގެ "އަޑުތަކެއް" ފެތުރެމުން އެބަދެއެވެ.
އިތުބާރު ހުރި ފަރާތަކުން ރާއްޖެއެމްވީ އަށް މައުލޫމާތު ދިން ގޮތުގައި ޕާކިސްތާނުގެ އެމްބަސަޑަރ ވައިސް އެޑްމިރަލް ރިޓަޔާޑް ވަސީމް އަކްރަމް އަންނަނީ މައްސަލަ ތަހުގީގު ކުރަމުންދާ ފުލުހުންނަށް ގުޅައި ކްރިކެޓް ކޯޗުގެ މައްސަލަ ވަކިގޮތަކަށް ނިންމުމަށް ނުފޫޒު ފޯރުވަމުންނެވެ. ހަމައެހެންމެ އޭނާގެ ގާނޫނީ ވަކީލުންގެ ފީ ވެސް ދައްކަނީ ކްރިކެޓް ކޯޗު ނިސްބަތްވާ ޕާކިސްތާނުގެ އެމްބަސީއިން ކަން ރާއްޖެއެމްވީ އަށް ވަނީ މައުލޫމާތު ލިބިފައެވެ.
ޒުވާން ކްރިކެޓް ކުޅުންތެރިންނަށް އާސިފް ވަނީ އެކި ފަހަރު މަތިން ޖިންސީ ގޯނާ ކުރިކަމުގެ ތުހުމަތުގައި އޭނާ ހައްޔަރު ކުރުމަށް ފަހު ދޫކޮށްލަން ޖެހުނީ ޖިނާއީ އިޖުރާއަތުގެ ގާނޫނުގައި ބުނާ މުހުލަތުގެ ތެރޭގައި އޭނާ ކޯޓަށް ނުގެންދެވުމުންނެވެ. އޭނާ އެ އަމަލު ހިންގި ކަމަށް ތުހުމަތު ކުރާ ކުދިންގެ ތެރޭގައި، 18 އަހަރު ނުފުރޭ ކުޑަކުދިން ވެސް ހިމެނެއެވެ.
މީގެއިތުރުން އާސިފްގެ މައްސަލަ ފެންމަތިވެފައި ވަނިކޮށް، އޭނާއަށް އެއްވެސް ފިޔަވަޅެއް ނާޅައި ރާއްޖެއިން ފުރުވާލަން ކްރިކެޓް ބޯޑް އޮފް މޯލްޑިވްސްއިން މަސައްކަތް ކުރި ކަމުގެ އަޑުތަކެއް ވެސް މީގެ ކުރިން ފެތުރުނެވެ.
