ބުރާސްތި ދުވަހު ބާއްވަން ހަމަޖެހިފައި އޮތް ވޮލީބޯޅަ އެސޯސިއޭޝަން އިންތިހާބު މުއްދަތެއް ނެތްގޮތަށް ފަސް ކޮށްފިއެވެ.
ވީއޭއެމް އިންތިހާބު ބާއްވަން ތާރީހު ކަނޑައެޅުމުގެ ކުރިން ވެސް ދުނިޔޭގެ ވޮލީބޯޅައިގެ މައި އިދާރާ އެފްއައިވީބީ އިން ވަނީ ވޮލީގެ ނޯމަލައިޒޭޝަން ކޮމެޓީ ބަލައިނުގަންނަ ކަމަށް ވެސް ބުނެފައެވެ.
ވޮލީބޯޅަ އެސޯސިއޭޝަންގެ މައްސަލަތަކެއް ބެލުމަށްފަހު، އެސޯސިއޭޝަންގެ އިންތިހާބީ ހިންގާ ކޮމިޓީ އުވާލައި، އާ އިންތިހާބެއް ބޭއްވުމަށް ނޯމަލައިޒޭޝަން ކޮމިޓީއެއް އެކުލަވާލައި، އާ އިންތިހާބު ބާއްވަން އެ ކޮމިޓީއާ ހަވާލުކޮށްފައިވަނީ ސްޕޯޓްސް ކޮމިޝަނަރ ހީނާ ސަލީމްއެވެ
ނަމަވެސް އެފްއައިވީބީން ވަނީ މީގެކުރިންވެސް ނޯމަލައިޒޭޝަން ކޮމިޓީ ބަލައިނުގަންނާނެ ކަމަށް ބުނެ، އިންތިހާބީ ލީޑާޝިޕާ އެސޯސިއޭޝަން ހަވާލުކުރުމަށް އަންގާފައެވެ. އަދި ނޯމަލައިޒޭޝަން ކޮމިޓީން ހިންގާ އެއްވެސް ހަރަކާތެއް ބަލައިނުގަންނާނެ ކަމަށްވެސް އެފްއައިވީބީން ކުރިން ވަނީ ބުނެފައެވެ
ވޮލީބޯޅަ އެސޯސިއޭޝަނުގެ އިންތިހާބީ ރައީސް މުހައްމަދު ލަތީފް ލަތީބެ ވިދާޅުވީ ގާނޫނުތަކާއި އޮލިމްޕިކް ޗާޓަރާއި އެފްއައިވީބީގެ އެންގުމާ ޚިލާފަށް، ނޯމަލައިޒޭޝަން ކޮމިޓީން ހިންގަމުން ގެންދާ ކަންކަން މިހާރުން މިހާރަށް ހުއްޓާލުމަށް ނޯމަލައިޒޭޝަން ކޮމިޓީއަށް އިލްތިމާސްކުރާ ކަމަށާއި، އޮލިމްޕިކް ޗާޓަރަށާއި އެފްއައިވީބީގެ އެންގުމާ އެއްގޮތަށް ޢަމަލުކުރުމަށް ވީއޭއެމްގެ އެންމެހާ މެމްބަރު ކުލަބުތަކަށް ތަކުރާރުކޮށް ހަނދާންކޮށްދޭ ކަމަށެވެ
މީގެއިތުރުން އޮލިމްޕިކް ޗާޓަރާއި އެފްއައިވީބީގެ އެންގުމާ ޚިލާފަށް، ނޯމަލައިޒޭޝަން ކޮމިޓީން ޢަމަލުކުރަމުންދާގޮތުން، ވޮލީބޯޅައަށް ދެރަގޮތެއް މެދުވެރިވެދާނެކަމަށް ފެންނާތީ، ވޮލީބޯލް އެސޯސިއޭޝަން އޮފް މޯލްޑިވްސްގެ އިންތިޚާބީ ހިންގާކޮމިޓީގެ ފަރާތުން ނުހަނު ހިތާމަކުރާ ކަމަށްވެސް ލަތީބެ ވިދާޅުވިއެވެ. އަދި ޒާތީ ތައައްޞުބާއި ހަސަދަ އެއްފަރާތްކޮށް، ކުޅިވަރުގެ ރޫޙާ އެއްގޮތަށް ހުރިހާ ފަރާތްތަކުން ޢަމަލުކުރުމަށް ވީއޭއެމްގެ އިންތިޚާބީ ހިންގާކޮމިޓީގެ ފަރާތުން ނަޞޭޙަތްތެރިވާ ކަމަށްވެސް ލަތީބެ ވިދާޅުވިއެވެ
