އެވަޓަންގެ ކުރީގެ ސްޓްރައިކަރ ކެލަމް ޑައިސަން އުމުރުން 23 އަހަރުގައި ކުޅުން ހުއްޓާލައިފިއެވެ.
ސޯޝަލް މީޑިއާގައި ކުރި ޕޯސްޓެއްގައި ކެލަމް ބުނީ، މީގެ ދެ އަހަރު ކުރިން ފައިގެ ތަނބި ކަށްޓަށް ލިބުނު ސީރިއަސް އަނިޔާއިން އަދިވެސް ސަލާމަތް ނުވެވޭ ކަމަށާއި، އެގޮތުން ފުޓުބޯޅަ ކުޅުން ހުއްޓާލަން ނިންމާފައިވާ ކަމަށެވެ.
އިނގިރޭސި ވިލާތަށް އުފަން ކެލަމް ބުނީ، ދެކެމުން އައި ހުވަފެންތައް ކުއްލިއަކަށް ނިމުމަކަށް ގެންނަން ނިންމުމަކީ ފަސޭހަ ނިންމުމެއް ނޫން ކަމަށާއި، ނަމަވެސް ހާސިލުކުރެވުނު ކަންކަމާ މެދު އުފާވާ ކަމަށެވެ.
މީގެއިތުރުން ކެލަމް ބުނީ، މުސްތަގުބަލުގައި ދެން ކުރާނެ ކަމަކާމެދު މިހާރު ވިސްނަމުން އަންނަ ކަމަށާއި، ފާއިތުވެދިޔަ ދެ އަހަރު ޕްލައިމައުތު އަދި އެވަޓަންއިން ދިން އެއްބާރުލުމަށް ޝުކުރު އަދާކުރާ ކަމަށެވެ.
އެވަޓަންގެ އެކަޑަމީއިން ފުޓުބޯޅަ ކުޅެން ފެށި ކެލަމް އެވަޓަންގެ ސީނިއަރ ޓީމާ ގުޅީފައިވަނީ 2015 ވަނަ އަހަރުގެ ސީޒަނުގައެވެ. އޭނާ ވަނީ ލޯން އެއްބަސްވުމުގެ ދަށުން އެވަޓަންގައި ހުރެ ސްޓޮކްޕޯޓް ކައުންޓީ އާއި ޗެސްޓަރ އާއި ގްރިމްސްބައި ޓައުން އާއި ޕްލައިމައުތު އަދި ސްޓެވެނޭޖްއަށް ކުޅެފައެވެ.
ކެރިޔަރުގައި ޖުމްލަ 30 މެޗު ކުޅެ، ހަތް ލަނޑު ކާމިޔާބުކޮށްފައިވާ ކެލަމް ވަނީ 2016 ވަނަ އަހަރުގެ ސީޒަނުގައި ގްރިމްސީ ޓައުންގެ އެންމެ މޮޅު ޒުވާން ކުޅުންތެރިޔާގެ މަގާމު ހޯދާފައެވެ.
