ފުލުހުންގެ ގާނޫނަށް އިސްލާހު ގެނައުމުގެ ބިލުގެ މަސައްކަތް ކުރުމަށް އެކުލަވާލާފައިވާ ކޮމިޓީގެ ބައްދަލުވުން މީޑިއާއަށް ސިއްރުކޮށްފިއެވެ.
މި ގާނޫނަށް އިސްލާހު ގެނައުމަށް ކަމާބެހޭ ފަރާތްތައް ސަލާމަތީ ހިދުމަތުގެ ކޮމިޓީއާއި މިނިވަން މުއައްސަސާތަކުގެ ކޮމިޓީ ގުޅިގެން ހަދާފައިވާ ކޮމިޓީއަށް ހާޒިރުކޮށް ބާއްވަން ނިންމި ހަތަރު ކޮމިޓީއެއް ވަނީ ސިއްރުކޮށްފައެވެ.
އެގޮތުން އާދީއްތަ ދުވަހުގެ ހެނދުނު 10 ޖެހި އިރު ބޭއްވި ކޮމިޓީ ބައްދަލުވުމުގައި އެ ކޮމިޓީގެ މުގައްރިރު ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވީ ކޮމިޓީއަށް ހާޒިރުކުރަން ނިންމި މުއައްސަސާތަކުގެ ބޭފުޅުން ކޮމިޓީ ސިއްރު ކުރަން އެދިފައިވާކަމަށެވެ. އެހެންކަމުން ފުލުހުންގެ ގާނޫނަށް އިސްލާހު ގެނައުމުގެ ބިލުގެ މިއަދުގެ ކޮމިޓީތައް ސިއްރު ކުރަން ނިންމާފައިވާ ކަމަށެވެ.
މިއަދު ކޮމިޓީތަކަށް ހާޒިރުކުރުމަށް ނިންމާފައިވަނީ ހޯމް މިނިސްޓްރީއާއި މޯލްޑިވްސް ކަރެކްޝަނަލް ސާރވިސަސްގެ ބޭފުޅޫންނާއި އެމްއެންޑީއެފްގެ ބޭފުޅުންނާއި، ޕްރޮސެކިއުޓާ ޖެނެރަލްގެ އޮފީހުގެ ބޭފުޅުންނާއި، ހިއުމަން ރައިޓްސް ކޮމިޝަން އޮފް ދަ މޯލްޑިވްސް އާއި، ނެޝަނަލް އިންޓްގްރިޓީ ކޮމިޝަން އަދި ލޯކަލް ގަވަރމަންޓް އޮޓޯރިޓީގެ ބޭފުޅުންނެވެ.
