200 އަށްވުރެ ގިނަ ބައިވެރިންނާއެކު ދިރާގު މާލޭ އޯޕެން 2019 ފަށައިފިއެވެ.

ހޮނިހިރު ދުވަހުފެށި މި މުބާރާތަކީ 1 ކިލޯ މީޓަރުގެ އޯޕެން ވޯޓަރ މުބާރާތެކެވެ. ދިރާގުން ބުނީ މި މުބާރާތަކީ ދިވެހިރާއްޖޭގައި މި ގޮތަށް ބާއްވާ އެންމެ ބޮޑު ފެތުމުގެ މުބާރާތް ކަމަށެވެ.

މި މުބާރާތް ރާވައި އިންތިޒާމު ކުރަނީ ސްވިމް މޯލްޑިވްސް އިންނެވެ. ސްވިމް މޯލްޑިވްސް އަކީ ފެތުމާއި މޫދު ކުޅިވަރު ކުރިއަރުވައި ތަރައްޤީކޮށް ކުރިއެރެވުމަށް މަސައްކަތްކުރާ ޖަމިއްޔާއެކެވެ. މި މުބާރާތް ބާއްވާ މައިގަނޑު މަޤްޞަދަކީ، ވީހާވެސް ގިނަ ބަޔަކަށް ވާދަވެރި ރައްކާތެރި އުފާވެރި މާޙައުލެއްގައި ފެތުމާއި މޫދު ޙަކާތްތަކުގައި ބައިވެރިވުމުގެ ފުރުޞަތު ފަހިކޮށްދިނުން ކަމަށް މުބާރާތް އިންތިޒާމް ކުރާ ސްވިމް މޯލްޑިވްސް އިން މަޢުލޫމާތުދެއެވެ.

މުބާރާތުގެ އުމުރުފުރާތަކުގެ ކެޓަގަރީއަކީ 7 އަހަރާއި 10 އަހަރާ ދެމެދު، 11 އަހަރާއި 12 އަހަރާއި ދެމެދު، 13 އަހަރާއި 14 އަހަރާއި ދެމެދު، 20 އަހަރާއި 29 އަހަރާއި ދެމެދު، 30 އަހަރާއި 39 އަހަރާއި ދެމެދު، 40 އަހަރާއި 49 އަހަރާއި ދެމެދު އަދި 50 އަހަރުން މަތީގެ އުމުރުފުރާގެ ކެޓަގަރީއެވެ.

މުބާރާތް ކުރިޔަށްދާނީ ރަސްފަންނާވީ ދިމާލު ބޭރު ކަނޑުގެ ޞަރަޙައްދުގައެވެ. ނަމަވެސް މި މުބާރާތުގެ ކުޑަކުދިންގެ އިވެންޓް ކުރިޔަށްދާނީ ރަސްފަންނުގައެވެ.