ދިވެހި ފިލްމު އިންޑަސްޓްރީގެ އުހުގައި ފިޔަޖަހަމުން އަންނަ އެކްޓަރު އަލީ އާޒިމް (ދޮން އައްޔަ) ކައިވެނި ކޮށްފިއެވެ.
އައްޔަ ކައިވެނިކޮށްފައިވަނީ އާދިއްތަ ދުވަހުގެ މެންދުރު އެކެއް ޖަހާކަށް ހާއިރުކަމަށް ވަނީ މައުލޫމާތު ލިބިފައެވެ.
ޚަބަރު ލިބިފައިވާ ގޮތުގައި އައްޔަ ކައިވެނިކޮށްފައިވަނީ ގިނަ ދުވަސްތަކެއް ވަންދެން ލޯބީގެ ގޮތުން ގުޅިގެން އުޅުނު ހައްވާ ޖީނާ އާއެވެ.
ކައިވެނީގެ ބައެއް ފޮޓޯތައް އައްޔަ ފޭސްބުކްގައި އާންމުކޮށްފައިވާއިރު އެދެމަފަރިންނަށް ފިލްމީ ދާއިރާގެ ފަންނާނުންނާއި ރަހުމަތްތެރިން އަންނަނީ މަރުހަބާ ކިޔަމުންނެވެ.
ޑާންސް ގްރޫޕެއްގައި ނަށަން އުޅުނު އައްޔަ އެންމެ ފުރަތަމަ ފެންނަން ފެށީ ކުރު ފިލްމުތަކުންނެވެ. އެއަށްފަހު މަޑު މަޑުން ފީޗަރ ފިލްމުތަކުން ފެންނަމުން ގޮސް މި ފަހަކުން އުފައްދާފައިވާ ބައެއް ޑްރާމާ ތަކާއި ގިނަ ފިލްމުތަކުގެ މުހިއްމު ރޯލުތަކުން އޭނާ ވަނީ ފެނިފައެވެ.
އައްޔަ ކުޅެފައިވާ ފިލްމު ތަކުގެ ތެރޭގައި "ބޮސް"، "ހައްދު"، "ރަންދަރި"، "އާދޭސް"، "ފޯޓީ ޕްލަސް"،"ދައުވަތު" އަދި "ހުވާ" ފަދަ މަގްބޫލު ފިލްމުތައް ހިމެނެއެވެ.
