މުހިންމީ ސަރުކާރުގެ ދަރަނީގެ އަދަދު ނޫން ކަމަށާއި ރާއްޖެ އިގްތިސާދު ކުރިއެރުވުން ކަމުގައި މިނިސްޓަރ އޮފް ފިނޭންސް އިބްރާހިމް އަމީރް ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން މިނިސްޓަރ ވިދާޅުވީ، ސަރުކާރުގެ މަގްސަދަކީ ރާއްޖޭގެ އިގްތިސާދު ފުޅާކޮށް ކުދި އަދި މެދު ފަންތީގެ ވިޔަފާރިތައް ފުޅާކުރުން ކަމުގައެވެ. އަދި ރާއްޖޭގެ މެދު ފަންތީގެ އާއިލާތަކުގެ ދިރިއުޅުމުގެ ހާލަތު ރަނގަޅުވާން ފެށުމުން ގައުމުގެ އިގްތިސާދު ކުރިއަރަން ފަށާނެ ކަމުގައި މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ދަރަނީގެ އަދަދަށް ވުރެ މުހިންމީ، އިގްތިސާދު ކުރިއަރާ މިންވަރާ އަޅާ ބަލާއިރު، ދަރަނީގެ ނިސްބަތް ކަމުގައެވެ.

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވެރިކަމަށް ވަޑައިގެން އިރު ދަރަނި ހުރީ 48 ބިލިއަން ރުފިޔާގައި ކަމަށާއި މި ސަރުކާރުން މިހާތަނަށް ނަގާފައިވަނީ 1.9 ބިލިއަން ރުފިޔާގެ ދަރަނި ކަމުގައި މިނިސްޓަރ ވިދާޅުވިއެވެ. މީގެ ތެރެއިން 1.5 ބިލިއަން ރުފިޔާ ނުވަތަ 150 މިލިއަން ޑޮލަރުގެ ޓްރެޝަރީ ބޮންޑަކީ ފަހުން އިންޑިއާ ސަރުކާރުގެ ހިލޭ އެހީ ކަމުގައި ހަދައިދޭނެ ކަމުގެ ޔަގީންކަން އެ ސަރުކާރުން ދީފައިވާ ދަރަންޏެވެ. މިނިސްޓަރ ވަނީ ސަރުކާރުގެ ދަރަނި އިތުރުވާން ފެށީ މި ސަރުކާރު އައުމުން ނޫން ކަމުގައި ވިދާޅުވެފައެވެ.

މިނިސްޓަރ އަމީރް އިތުރަށް ވިދާޅުވީ، ސަރުކާރުން މިހާތަނަށް 325 މިލިއަން ރުފިޔާގެ ޓްރެޝަރީ ބިލް ރާއްޖޭގައި ވިއްކާފައި ވާނެ ކަމަށާއި މި ބިލް ތަކުގެ ތެރެއިން ގިނަ ބިލް ތަކަކީ ކުރިން ވިއްކާފައި ހުރި ބިލްތައް މެޗުއަރ ވުމުން ރޯލްއޯވަރ ކުރުމަށް ހުޅުވާލުމުން ބޭންކް ތަކުން ސަބްސްކްރައިބް ކޮށްފައިވާ ބިލްތަކެއް ކަމުގައެވެ.

ސަރުކާރުން ގުޅުން ބަދަހިކޮށްފައި ވަނީ ހަމައެކަނި އިންޑިއާ އާއި އެއްކޮށް ނޫން ކަމަށާއި ރާއްޖެ އިންޑިއާއަށް ދަރަނިވެރި ކުރުމުގެ ވިސްނުމެއް ނުގެންގުޅޭކަމަށް މިނިސްޓަރ ވިދާޅުވިއެވެ.