ހުކުރު ދުވަހުގެރޭ ހިނގި އަލިފާނުގެ ހާދިސާއާ ގުޅިގެން އެ ސަރަހައްދު ބަންދުކޮށް، ހުސްކުރި ގެތަކުގެ ތެރެއިން ގެއަކުން ވައްކަން ކޮށްފައިވާ ކަމަށް ފުލުހުން ބުނެފިއެވެ.

އެކަމާ ގުޅޭގޮތުން ފުލުހުން ބުނީ، އަލިފާނުގެ ހާދިސާ ހިނގައިގެން އުޅުނު ވަގުތު ގޭގެއިން މީހުން ހުސްކޮށްފައިވަނިކޮށް އެ ސަރަހައްދުގައި ހުރި ގެއެއްގެ 7 ވަނަ ފަންގިފިލާއިން ވައްކަން ކޮށްފައިވާ މައްސަލައެއް ހޮނިހިރު ދުވަހު 10:34 ހާއިރު ފުލުހުންނަށް ރިޕޯރޓް ކޮށްފައިވާ ކަމަށެވެ.

އެގޮތުން އެގޭގެ 7 ވަނަ ފަންގިފިލާއިން 700 ޑޮލަރާއި، އައިވޮޗެއްގެ އިތުރުން އެއަރޕޮޑެއް ވަގަށް ގެންގޮސްފައިވާއިރު، އެގޭގެ 8 ވަނަ ފަންގިފިލާއިން ވައްކަންކޮށް 37،200 އަށްވުރެ ގިނަ ފައިސާ ވަގަށް ނަގާފައިވާ ކަމުގެ ރިޕޯރޓް ހޮނިހިރު ދުވަހު 11:52 ހާއިރު ލިބިފައިވާ ކަމަށް ފުލުހުން ބުނެއެވެ.

މި ދެ މައްސަލަވެސް ފުލުހުން ދަނީ ތަހުޤީޤު ކުރަމުންނެވެ.

ހުކުރު ދުވަހުގެރޭ ހިނގި ނުރައްކާތެރި އަލިފާނުގެ ހާދިސާއާ ގުޅިގެން 7 ގެއަކަށް ބޮޑެތި ގެއްލުންތަކެއް ލިބިފައިވާއިރު، އެކެއްގެ ފުރާނަވެސް ވަނީ ގެއްލިފައެވެ.