ފްރެންޗް ލީގުގައި ނޭމާ އެނބުރި އައިސް ޕެރިސް ސެއިންޓް ޖާމަން (ޕީއެސްޖީ) މޮޅުކޮށްދީފިއެވެ.
ހޮނިހިރު ދުވަހުގެ ރޭ ކުޅުނު މެޗުން ޕީއެސްޖީ މޮޅުވީ ސްޓްރެސްބާގްއާ ވާދަކޮށް 0-1 ގެ ނަތީޖާއަކުންނެވެ.
ޕީއެސްޖީ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ އެޓީމުންނެވެ. އެގޮތުން ލަނޑު ޖެހުމަށްވެސް އެޓީމަށް ވަނީ ފުރުސަތުތަކެއް ލިބި ބޭކާރުވެފައެވެ.
މި ހާފްގައި ސްޓްރެސްބާގަށް ވެސް ލަނޑު ޖެހުމަށް ފުރުސަތުތަކެއް ލިބިފައިވާއިރު، އެ ފުރުސަތުތަކުގެ ބޭނުން އެޓީމަށް އެންމެ އެދެވޭ ގޮތެއްގައި ހިފިފައެއް ނުވެއެވެ.
ދެވަނަ ހާފް ފެށިގެން ޕީއެސްޖީން އެޓީމުގެ ކުޅުން އިތުރަށް ވަރުގަދަކުރިއިރު، ލަނޑު ޖެހުމަށް އެޓީމުން ދިޔައީ ފުލުފުލުގައި ފުރުސަތު ހޯދަމުންނެވެ.
ޕީއެސްޖީން މެޗުގެ ލީޑު ނެގީ އިތުރުވަގުތުގައެވެ. މި ލަނޑު އެޓީމަށް ކާމިޔާބުކޮށްދިނީ ނޭމާއެވެ. އޭނާ މި ލަނޑު ކާމިޔާބުކުރީ އޯވާ ހެޑަކުންނެވެ. އަދި މިއީ އޭނާ މި ސީޒަނުގައި ކުޅުނު ފުރަތަމަ މެޗެވެ.
މި ނަތީޖާއާއެކު ޕީއެސްޖީ އޮތީ ކުޅުނު ފަސް މެޗުން ލިބުނު 12 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. މެޗުން ބަލިވި ސްޓްރެސްބާގް އޮތީ ކުޅުނު ފަސް މެޗުން ލިބުނު ތިން ޕޮއިންޓާއެކު ޕޮއިންޓް ތާވަލުގެ 18 ވަނައިގައެވެ.
