ރާއްޖޭގެ ހުރިހާ ރަށަކަށް އަމާޒުކޮށްގެން ރައްކާތެރި ގޮތުގައި ކުނި ނައްތާލުމުގެ ޕްރޮގްރާމެއް ފަށަން ތައްޔާރުވަމުންދާކަމަށް މިނިސްޓަރ އޮފް އެންވަޔަރމަންޓް ޑރ ހުސައިން ރަޝީދް ހަސަން ވިދާޅުވެއްޖެއެވެ.

ރައްޔިތުންގެ މަޖިލީހުގެ ބުރާސްފަތި ދުވަހުގެ ޖަލްސާގައި ލ. ގަމުގެ ކުނީގެ މައްސަލައާ ގުޅޭގޮތުން ގަމު ދާއިރާގެ މެމްބަރު މުހައްމަދު ވިސާމް ކުރެއްވި ސުވާލަކަށް ޖަވާބުދެއްވަމުން މިނިސްޓަރ ވިދާޅުވީ، ކުނީގެ މައްސަލައަކީ މުޅި ރާއްޖެއަށް ކުރިމަތިވެފައިވާ މައްސަލައެއް ކަމަށާއި، އެކަމަށް ދާއިމީ ހައްލެއް ގެނައުމަށްޓަކައި މުޅި ރާއްޖެ ސާފު ކުރުމުގެ ޕްރޮގްރާމެއް ފަރުމާކޮށްފައިވާ ކަމަށެވެ،

މިނިސްޓަރ ވިދާޅުވީ، މި ޕްރޮގްރާމް ހިންގުމަށް ރައީސް އޮފީހުންވެސް ހުއްދަ ލިބިފައިވާ ކަމަށާއި، މަސައްކަތުގެ ބިޑިންގ އާ ގުޅޭ ކަންކަން ކުރުމަށް ފިނޭންސް މިނިސްޓްރީއަށް ހުށައަޅާފައިވާ ކަމަށެވެ. އެގޮތުން ބިޑްތައް އިއުލާނު ކުރެވުމުން ކޮންމެ ރަށެއްގައިވެސް ވަކިވަކިން މި މަޝްރޫއު ފެށިގެންދާނެ ކަމަށާއި، އެއަށްފަހު ކައުންސިލުތަކާ ގުޅިގެން ދެމެހެއްޓެނިވި ގޮތެއްގައި ރަށްރަށް ސާފުކުރުމުގެ އިންތިޒާމު ހަމަޖައްސަވާނެ ކަމަށް މިނިސްޓަރ ވިދާޅުވިއެވެ.

މިނިސްޓަރ އިތުރަށް ވިދާޅުވީ، މި މަސައްކަތް ޚާއްސަ އިސްކަމެއްދެއްވައިގެން ކުރައްވާނެ ކަމަށާއި، ކައުންސިލުތަކަށް ސަރުކާރާއި މަޖިލިސް މެދުވެރިކޮށް އެކަށީގެންވާ ބަޖެޓު ހަމަޖެހުމުން މި މަސައްކަތް ދެމެހެއްޓެނިވި ގޮތެއްގައި ކުރުމަށް ފަސޭހަވެގެންދާނެ ކަމަށެވެ.

މިނިސްޓަރ އެހެން ވިދާޅުވެފައިވާއިރު، ރަށްރަށުގެ ކުނި މެނޭޖް ކުރުމަށް ޕީއެސްއައިޕީ ބަޖެޓުގެ ދަށުން ސަރުކާރުން ދަނީ ގިނަ މަޝްރޫއުތަކެއް ހިންގަމުންނެވެ. އެގޮތުން މިސަރުކާރުގެ ވައުދުތަކުގެ ތެރޭގައި ކުނިން އާމްދަނީ ހޯދުމާއި ކަރަންޓު އުފެއްދުން ހިމެނިފައިވެއެވެ. އަދި މިމަސައްކަތުގެ ތެރެއިން ރ.ވަނދޫގައި ގާއިމްކޮށްފައިވާ ވޭސްޓް މެނޭޖްމަންޓް ސެންޓަރުން ވަނީ ރާއްޖޭގައި ފުރަތަމަ ފަހަރަށް ކުނިން ކަރަންޓު އުފައްދާފައެވެ.