ރަހީނުކޮށް މަރާލާފައިވާ ނޫސްވެރިޔާ އަހުމަދު ރިލްވާނުގެ އާއިލާއާއި މިނިސްޓަރ އޮފް ހޯމް އެފެއާޒް ޝެއިހް އިމްރާން އަބްދުﷲ އަދި ކޮމިޝަނަރ އޮފް ޕޮލިސް މުހައްމަދު ހަމީދު ބައްދަލު ކުރައްވައިފިއެވެ.
ބުދަ ދުވަހު ބޭއްވި މި ބައްދަލު ކުރެއްވުމުގައި އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ރިޔާޒްވެސް ބައިވެރިވެ ވަޑައިގެންފައިވާއިރު، ބައްދަލުވުމުގައި ކުރެވުނު މަޝްވަރާތަކުގެ ތަފްސީލު ފުލުހުން ހާމަކޮށްފައެއް ނުވެއެވެ. އެކަމާ ގުޅޭގޮތުން ފުލުހުން ކުރި ޓްވީޓެއްގައި ބުނީ، މަރު ކޮމިޝަނުން އާންމު ކުރި މައުލޫމާތުތަކާއި ގުޅިގެން ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީއާއެކު ބައްދަލުވުމެއް ރޭވުމަށް އެދިފައިވާނެ ކަމަށެވެ.
Home Minister & Commissioner of Police met with the family of Ahmed Rilwan this morning. Commissioner has formally requested the People’s Majlis to arrange a meeting with its Committee on Security Services with respect to DDCOM’s findings in to cases of deaths & disappearances. pic.twitter.com/ntlsTJzjTH
— Maldives Police (@PoliceMv) September 4, 2019
ފުލުހުން އެހެން ބުނެފައިވާއިރު، ރިލްވާން އަބްދުﷲ ރަހީނުކޮށް މަރާލި މައްސަލައި ގެއްލުވާލާފައިވާ މީހުންގެ މައްސަލަތައް ތަހުގީގުކުރާ ކޮމިޝަންގެ އެދުމުގެ މަތިން 14 ފަރާތެއްގެ ޕާސްޕޯޓް ހިފަހައްޓާފައިވާ ކަމަށް އިމިގްރޭޝަނުން ވަނީ ބުނެފައެވެ. އެގޮތުން އާދީއްތަ ދުވަހުން ފެށިގެން މިހާތަނަށް 14 ފަރާތެއްގެ ޕާސްޕޯޓް އެކޮމިޝަނުން ހިފަހައްޓާފައިވާއިރު، ރިޔާސީ ކޮމިޝަނުން ކުރި ތަހުގީގުގެ ހުލާސާ ރިޕޯޓު މަޖިލީހުގެ ވެބްސައިޓްގައިވެސް ވަނީ އާންމުކޮށްފައެވެ.
