އަނިޔާވެރި ގޮތަކަށް މަރާލާފައިވާ މިނިވަންނޫހުގެ ނޫސްވެރިޔާ އަހުމަދު ރިލްވާންއަށް އިންސާފު ހޯދައިދިނުމަށް ކުރެވެން ހުރި ހުރިހާ މަސައްކަތެއް ކުރައްވާނެ ކަމަށް ކުރީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރިލްވާންގެ މަރާ ގުޅިގެން ރައްޔިތުންގެ މަޖިލީގުގައި އޭނާގެ އާއިލާއާ ބައްދަލުކުރައްވައި ރައީސް ނަޝީދު ވިދާޅުވީ ރިލްވާން މަރާލުމުގައި އުޅުނު މީހުންނާއި، އެހީތެރިވެ ބާރުއެޅި މީހުން ހޯދާ ހައްގު އަދަބު ދޭނެ ކަމަށެވެ.

ރައީސް ނަޝީދު ވިދާޅުވީ ރިލްވާން އަދި ރިލްވާންގެ އާއިލާއަށް އިންސާފު ހޯދައިދިނުމަށް ކުރެވެން ހުރި ހުރިހާ މަސައްކަތެއް ކުރާނެ ކަމަށާއި، ރައްޔިތުންގެ މަޖިލިސް އެކީ އޮތީ އެއާއިލާއެކު ކަމަށެވެ.

ރިލްވާންގެ އާއިލާގެ ފަރާތުން މިބައްދަލުވުމުގައި ބައިވެރިވީ ރިލްވާންގެ އެއްބަޑު އެއްބަފާ ދައްތަ ޝެހެނާޒް އާދަމްއެވެ.

ރިލްވާންގެ އާއިލާއާ ރައީސް ނަޝީދު ހޯމަ ދުވަހު ބައްދަލުކުރައްވާފައިވާއިރު މިމައްސަލައިގައި ޝާމިލްވާ މީހުންގެ މައްޗަށް ދައުވާ ކުރުން އަވަސްކޮށް ދިނުމަށް އެމަނިކުފާނުވަނީ ގޮވާލައްވާފައެވެ.

ނޫސްވެރިޔާ އަހުމަދު ރިލްވާން ގެއްލިފައިވަނީ 2014 ވަނަ އަހަރުގެ އޮގަސްޓު މަހުގެ 8 ވަނަ ދުވަހުގައެވެ.