މާލޭގައި ވިއްކުމަށް ބަހައްޓާފައިހުރި އިސްލާމްދީނުގެ އަސްލުތަކާ ޚިލާފު ވާހަކަ ލިޔެވިފައި ހުރި ފޮތްތަކެއް ކަސްޓަމްސްގެ ބެލުމުގެ ދަށަށް ނަގައިފިއެވެ.

ކަސްޓަމްސްއިން ބުނީ އިސްލާމްދީނުގެ އަސްލުތަކާ ޚިލާފު ވާހަކަ ލިޔެވިފައި ހުރި 109 ފޮތެއް މާލޭގައި ވިއްކުމަށް ބަހައްޓާފައި ވަނިކޮށް އެފޮތްތައް ނަގާފައިވާ ކަމަށެވެ.

އެފޮތްތައް ކަސްޓަމްސްގެ ބެލުމުގެ ދަށަށް ނެގީ 30 އޮގަސްޓުގައެވެ. ނަމަވެސް އެފޮތްތައް ނެގީ ކޮންތާކުންކަން ކަސްޓަމްސްއިން ހާމައެއްނުކުރެއެވެ.

މައުލޫމާތު ލިބޭ ގޮތުގައި އެ ފޮތްތައް ވިއްކަން ހުރީ ނޮވެލްޓީ ބުކްސޮޕުން ބާއްވާ ނޮވެލްޓީ ބުކްފެއަރގައެވެ. 29 އޮގަސްޓް އިން ސެޕްޓެމްބަރ 10 ވަނަ ދުވަހާއި ހަމައަށް ދަރުބާރު ގޭގައި ބާއްވަމުން ފެއާގައި އެފޮތްތައް ވިއްކަން ހުރުމުގެ ސަބަބުން ގިނަ ބައެއްގެ ފާޑު ކިޔުން ވަނީ އަމާޒުވެފައެވެ.