ޕްލޭނިން މިނިސްޓްރީން ގިނަ ރަށްތަކެއްގެ ބަނދަރު ހެދުމުގެ މަސައްކަތާއި، އަޕްގްރޭޑް ކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީއާ) ހަވާލު ކޮށްފިއެވެ.

މިއެއްބަސްވުންތަކުގައި ޕްލޭނިން މިނިސްޓްރީގެ ފަރާތުން ސޮއިކުރެއްވީ އެމިނިސްޓްރީގެ ޑިރެކްޓަރު ފާތިމަތު ޝަނާ ފާރޫގެވެ. އެމްޓީސީސީގެ ފަރާތުން ސޮއި ކުރެއްވީ އެކުންފުނީގެ ސީއީއޯ ހަސަން ޝާހު އެވެ.

ޕްލޭނިން މިނިސްޓްރީން ބުނީ މިއެއްބަސްވުންތަކުގެ ދަށުން ހދ. ނެއްލައިދޫ އަދި މ. ވޭވަށް ބަނދަރު އަޕްގްރޭޑް ކުރުމުގެ މަސައްކަތް ކުރާނެ ކަމަށާއި، 365 ދުވަސް ތެރޭގައި ނިންމާ ގޮތަށް ނެއްލައިދޫ ބަނދަރު އަޕްގްރޭޑް ކުރުމުގެ މަސައްކަތް ހަވާލުކުރީ 47,623,290.28 (ސާޅިސް ހަތް މިލިއަން ހަލައްކަ ތޭވީސްހާސް ދުވިއްސައްތަ ނުވަދިހަ ރުފިޔާ އަށާވީސް ލާރި) ރުފިޔާއަށް ކަމަށެވެ. އަދި ވޭވަށް ބަނދަރު އަޕްގްރޭޑް ކުރުމުގެ މަސައްކަތް 500 ދުވަސް ތެރޭގައި ނިންމާ ގޮތަށެވެ. މިމަޝްރޫއަށް 48,863,172.98 (ސާޅިސް އަށް މިލިއަން އަށްލައްކަ ފަސްދޮޅަސް ތިންހާސް ސަތޭކަ ހަތްދިހަ ދެ ރުފިޔާ ނުވަދިހަ އަށް ލާރި) ޚަރަދުވާނެއެވެ.

ޕްލޭނިން މިނިސްޓްރީން ބުނީ ރ. އަނގޮޅިތީމް ބަނދަރުގެ ސާރވޭ އެންޑް ޑިޒައިންގ ހެދުމަށް ވެސް ސޮއިކޮށްފައިވާއިރު، މިމަޝްރޫއަށް 305,505.10 (ތިންލައްކަ ފަސްހާސް ފައްސަތޭކަ ފަސް ރުފިޔާ ދިހަ ލާރި) ރުފިޔާ ޚަރަދުވާނެ ކަމަށެވެ. އަދި މި މަޝްރޫއުއަކީ 25 ދުވަހުގެ ތެރޭގައި ނިންމުމަށް ހަވާލުކޮށްފައިވާ މަޝްރޫއެކެވެ.

މީގެ އިތުރުން މިނިސްޓްރީން ބުނީ ރ. މަޑުއްވަރީ އައު ބަނދަރު ހެދުމުގެ މަސައްކަތް ހަވާލު ކޮށްފައިވަނީ 590 ދުވަހުގެ ތެރޭގައި ނިންމާ ގޮތަށް ކަމަށެވެ. އަދި މިމަޝްރޫއުއަށް 68,665,360.81 (ފަސްދޮޅަސް އަށް މިލިއަން ހަލައްކަ ފަސްދޮޅަސް ފަސްހާސް ތިން ސަތޭކަ ފަސްދޮޅަސް ރުފިޔާ އަށްޑިހަ އެއްލާރި) ރުފިޔާ ހަރަދުވާނެ ކަމަށް މިނިސްޓްރީން މައުލޫމާތުދެއެވެ.

ޕްލޭނިން މިނިސްޓްރީން ބުނީ ހއ އިހަވަންދޫ އައު ބަނދަރު ހެދުމުގެ 400 ދުވަހުގެ ތެރޭގައި ފުރިހަމަ ކުރާ ގޮތަށް އެމްޓީސީސީއާ އެއްބަސްވުމުގައި ސޮއިކޮށްފައިވާ ކަމަށެވެ. އަދި މިމަޝްރޫއުއަށް 51,725,810.09ރ. (ފަންސާސް އެއް މިލިއަން ހަތްލައްކަ ފަންސަވީސްހާސް އަށްސަތޭކަ ދިހަ ރުފިޔާ ނުވަ ލާރި) ހަރަދުވާނެއެވެ.