ވިލިމާލެ އިރުދެކުނު ފަރާތަށް ކެނޯ ދުއްވުމަށް ނުކުތް ދެމީހެއްގެ ޚަބަރެއް ނުވެގެން އެމްއެންޑީއެފް މާލެ އޭރިއާ ކޯސްޓްގާޑް ސްކޮޑްރަންއިން ހަރަކާތްތެރިވާން ފަށައިފިއެވެ.

މި ހާދިސާގެ ރިޕޯޓް އެމްއެންޑީއެފް މެރިޓައިމް ރެސްކިއު ކޯޑިނޭޝަން ސެންޓަރ (އެމްއާރުސީސީ) އަށް ލިބިފައި ވަނީ އާދިއްތަ ދުވަހުގެ ރޭ 20:54 ހާއިރުއެވެ. މި ދެމީހުންގެ ތެރެެއިން އެކަކު ލައިގެން ހުރީ ފެހި ކުލައިގެ ޓީޝާޓެއް ކަމަށާއި ދެވަނަ މީހާ ލައިގެން ހުރީ ނޫ ކުލައިގެ ޖާޒީއެއް ކަމަށް އެމްއެންޑީއެފް ކޯސްޓްގާޑަށް މަޢުލޫމާތު ދެއެވެ. އަދި ކެނޯއަކީ އޮރެންޖް ކުލައިގެ ކެނޯއެކެވެ. މި ދެމީހުން ހޯދުމަށް އެމްއެންޑީއެފް މާލެ އޭރިއާ ކޯސްޓްގާޑް ސްކޮޑްރަންގެ ފާސްޓް އިންޓަސެޕްޓް ކްރާފްޓް ވެލާނާ ލޯންޗާއި މޯލްޑިވްސް ޕޮލިސް ސަރވިސް ގުޅިގެން ދަނީ މަސައްކަތް ކުރަމުންނެވެ.

މި ދެ ދެމީހުންނާއި، ކެނޯއާ ބެހޭ އެއްވެސް ޚަބަރެއް ވޭތޯ އެ ސަރަހައްދުން ދަތުރުކުރައްވާ ފަރާތްތަކުން ބަލާ ދިނުމަށާއި މި ދެމީހުންނާއި ކެނޯއާ ބެހޭ އެއްވެސް މަޢުލޫމާތެއް ލިބިއްޖެނަމަ ލަސްނުކުރައްވާ އެމްއެންޑީއެފް ކޯސްޓްގާޑް ހިލޭ ގުޅޭ ނަންބަރު 191 އަށް، ގުޅުމަށް އެމްއެންޑީއެފް އިން ވަނީ އެދފައެވެ.