ޖުޑީޝަލް ސަރވިސް ކޮމިޝަން(ޖޭއެސްސީ)އަށް ވަކީލުންގެ ތެރެއިން އައްޔަން ކުރައްވާ މެމްބަރު އަބްދުލްމާނިއު ހުސައިން ރައީސް އިބްރާޙިމް މުހައްމަދު ސޯލިހު އައްޔަން ކުރައްވައިފިއެވެ.
ރައީސް އޮފީހުގައި ބުދަ ދުވަހު ބޭއްވި ރަސްމިއްޔާތެއްގައި މާނިއުއާއި އެ ލިޔުން ހަވާލުކޮށްދެއްވީ ރައީސް ސޯލިހެވެ.
ޖޭއެސްސީގައި ވަކީލުންގެ ތެރެއިން އައްޔަން ކުރައްވާ ވަކީލަކަށް މީގެ ކުރިން އިންނެވީ ލަތީފާ ގާސިމެވެ. ނަމަވެސް ގާނޫނީ ފަންނުގެ ގާނޫނު އައުމާއި ގުޅިގެން އޭނާގެ މަގާމު ވަނީ މިދިޔަ ޖޫން މަހުގެ 27 ވަނަ ދުވަހު ގެއްލިފައެވެ.
ވަކީލުންގެ ތެރެއިން ޖޭއެސްސީއަށް ދާނެ ވަކީލަކު ހޮވުމަށް ޖުލައި މަހުގެ 27 ވަނަ ދުވަހު ބޭއްވި ވޯޓުލުމުގައި ފަސް ވަކީލަކު ވާދަކުރިއެވެ. އެއީ މާނިއުގެ އިތުރުން ހަނީފާ ޚާލިދާއި އަހުމަދު ރަޝީދާއި އަލީ ރަޝީދާއި ކުރީގެ އިންފޮމޭޝަން ކޮމިޝަނަރ ޖަމާލު އަބޫބަކުރެވެ.
އޭގެރެއިން އެންމެ ގިނަ ވޯޓު ލިބިވަޑައިގެންނެވި މާނިއުއަށް ލިބިވަޑައިގެންނެވީ 199 ވޯޓެވެ.
