ދިވެހިރާއްޖޭގެ އިސްލާމީ ޔުނިވަރސިޓީން ބާއްވާ އިންޓަނޭޝަނަލް ކޮންފަރެންސް އޮން އިންޓަލެކްޗުއަލް އެޑްވާންސްމެންޓް(އައި.ސީ.އައި.އޭ) ކޮންފަރެންސްގެ ގޯލްޑް ސްޕޮންސަރ އަކަށް އެސްޓީއޯ ހަމަޖައްސައިފިއެވެ.
އިސްލާމިކް ޔުނިވަރސިޓީގައި ބުދަދުވަހު ބޭއްވި ރަސްމިއްޔާތުގައި ޔުނިވަރސިޓީގެ ފަރާތުން ސޮއިކުރެއްވީ ވައިސް ޗާންސްލަރ އައިޝަތު ހަލީލާ އަބްދުއްސައްތާރުއެވެ. އެސްޓީއޯގެ ފަރާތުން ސޮއިކުރެއްވީ އެގްޒެކްޓިވް ޑިރެކްޓަރ މަރިޔަމް ޕަރުވީން އަބްދުލް ފައްތާހުއެވެ.
ރަސްމިއްޔާތުގައި ވާހަކަފުޅުދައްކަވަމުން ވައިސް ޗާންސްލަރ އައިޝަތު ވިދާޅުވީ ތައުލީމީ ދާއިރާ ކުރިއެރުވުމަށް ކުންފުނިތަކުން އެހީތެރިކަން ބޭނުންވާކަމަށެވެ. އަދި އިސްލާމިކް ޔުނިވަރސިޓީގެ ކޮންފަރެންސަށް އެސްޓީއޯގެ އެހީތެރިކަން ދެއްވި ކަމަށްޓަކައި އެސްޓީއޯއަށް ޝުކުރުއަދާކުރެއްވިއެވެ. މީގެއިތުރުން ވައިސް ޗާންސްލަރ ވިދާޅުވީ މިފަދަ ބައިނަލްއަގްވާމީ ކޮންފަރެންސްތަކުގެ ސަބަބުން އާއްމުންގެ ތެރޭގައި ހޭލުންތެރިކަން އިތުރުކުރުމަށް ކުރާ މަސައްކަތް ކާމިޔާބުވަމުން އަންނަކަމަށެވެ.
އެސްޓީއޯގެ އެގްޒެކްޓިވް ޑިރެކްޓަރ މަރިޔަމް ޕަރުވީން ވިދާޅުވީ ތައުލީމީ ދާއިރާގެ ކުރިއެރުމަށް އެސްޓީއޯއިން އަބަދުވެސް އިސްކަމެއްދޭކަމަށާއި އެގޮތުން މި ކޮންފަރެންސްގެ ގޯލްޑް ޕާރޓްނާއަކަށް ވުމަކީ ލިބޭ ފަހުރެއްކަމުގައެވެ.
އިޖްތިމާއީ، އިގްތިސާދީ އަދި ސިޔާސީ ދާއިރާގެ އިތުރުން ތައުލީމީ ދާއިރާއިން ދިރާސާތައް ހުށައަޅާ މި ކޮންފަރެންސަކީ 2016 ވަނަ އަހަރުން ފެށިގެން ކޮންމެ އަހަރަކު ބާއްވަމުން އަންނަ ކޮންފަރެންސެކެވެ.
