މަގްސަދު ހާސިލުކުރެވިއްޖެ ކަމަށާއި، އުފަލާއެކު މިހާރު ރިޓަޔާވެވޭނެ ކަމަށް ރާއްޖޭގެ ކުރީގެ އެއް ނަމްބަރު ޓޭބަލް ޓެނިސް ކުޅުންތެރިޔާ މުއީނާ މުހައްމަދު ބުނެފިއެވެ.
ސޯޝަލް މީޑިއާގައި މުއީނާ ކުރި ޕޯސްޓެއްގައި ބުނީ، ގޭމްސްގައި ބޭނުންވި ޓާގެޓް ހާސިލުކުރެވިފައިވާ ކަމަށާއި، އުފަލާއެކު މިހާރު ރިޓަޔާކުރެވޭނެ ކަމަށެވެ.
މުއީނާ ބުނީ، މިދިޔަ އައިއޯއައިޖީ ގޭމްސްގައި ބޭނުންވީ އިތުރު އެއް މެޑަލް ކަމަށާއި، މިފަހަރު ބޭނުންވީ އިތުރު ދެ މެޑަލް ކަމަށެވެ. އަދި އެ ޓާގެޓްވެސް ހާސިލުކުރެވިފައިވާ ކަމަށް އޭނާ ވަނީ ބުނެފައެވެ.
މިފަހަރުގެ ގޭމްސްއަށްފަހު ރިޓަޔާކުރާނެކަން މުއީނާ ވަނީ މީގެކުރިން އިއުލާންކޮށްފައެވެ. އަދި ރިޓަޔާކުރާކަން އިއުލާންކުރުމަށްފަހު، ރާއްޖެއެމްވީއަށް މައުލޫމާތު ދެމުން އޭނާ ބުނީ، ގޭމްސްގައި ޓާގެޓަކީ ޓީޓީއަށް މެޑަލްއެއް ހޯދައިދިނުމަށްފަހު ކުޅުން ހުއްޓާލުން ކަމަށެވެ.
އެގޮތުން މުއީނާގެ އެހީއާއެކު ރާއްޖެއަށް ޓީމް އިވެންޓުން ރަން މެޑަލް ލިބިފައިވާއިރު، އޭނާއަށް ޑަބަލްސް އިވެންޓުން ރިހި މެޑަލް ވަނީ ލިބިފައެވެ.
މުއީނާ ކުޅުން ހުއްޓާލަން ނިންމީ، ޒުވާން ކުޅުންތެރިންނަށް ފުރުސަތު ދިނުމުގެ ގޮތުން އަދި ޓީޓީއަށް އޭނާއަށް ހިދުމަތްކޮށްދެވިއްޖެ ކަމަށް ގަބޫލުކުރާ ކަމަށާއި، މިވަގުތު މުހިންމީ ވަޒީފާ ކަމަށް ބުނެއެވެ.
އެގޮތުން މުއީނާ ބުނީ، ވަޒީފާ އަދާކުރަމުން ޓީޓީއަށް ދޭންޖެހޭ ވަރަށް ސަމާލުކަން އޭނާއަށް ނުދެވޭ ކަމަށާއި، އައިއޯއައިޖީއަށް ފަހު ހުރިހާ ފޯކަސްއެއްވެސް ދެން ކުރާނީ ވަޒީފާއަށް ކަމަށެވެ.
މުއީނާ މިވަގުތު ވަޒީފާ އަދާކުރަމުން އަންނަނީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އަންހެން ގައުމީ ޓީމު އަދި ޔޫތު ޓީމުތަކުގެ ފިޓްނެސް ކޯޗެއްގެ ހައިސިއްޔަތުންނެވެ.
ޓީޓީ ކުރިއަރުވަން ކޮށްދެވެން އޮތް ހުރިހާ މަސައްކަތެއް ކުރާނެކަން ފާހަގަކުރަމުން މުއީނާ ބުނީ، ޓީޓީ ކޯޗެއްގެ ގޮތުގައި އޭނާ ނުފެންނާނެ ކަމަށެވެ.
ނަމަވެސް މުއީނާ ބުނީ، ދެން އޭނާ ފެނިގެންދާނީ ސްޕޯޓްސް ފިޓްނެސް ކޯޗެއްގެ ގޮތުގައި ކަމަށާއި، އެއީ ހުރިހާ ކުޅިވަރަކަށްވެސް ވަރަށް މުހިންމު ބައެއް ކަމަށް ގަބޫލުކުރާ ކަމަށެވެ.
އައިއޯއައިޖީގައި 2011 ވަނަ އަހަރު ރިހި މެޑަލް ހޯދި މުއީނާ ވަނީ 1995 ވަނަ އަހަރު ބޭއްވި އެސޯސިއޭޝަން ޗެމްޕިއަންޝިޕްގެ ސިންގަލްސް ތަށި ހޯދައިފިއެވެ. އޭނާ ވަނީ އެސޯސިއޭޝަން ޗެމްޕިއަންޝިޕްގެ ސިންގަލްސް ޗެމްޕިއަންކަން 16 ފަހަރު، ޑަބަލްސް ޗެމްޕިއަންކަން 12 ފަހަރު އަދި މިކްސް ޑަބަލްސްގެ ޗެމްޕިއަންކަން ހަތް ފަހަރު ހޯދައިފައެވެ.
ގައުމީ މުބާރާތުގެ ޗެމްޕިއަންކަން 2003 ވަނަ އަހަރު ފެށިގެން 13 ފަހަރު ޖެހިޖެހިގެން ހޯދި މުއީނާ ވަނީ ގައުމީ މުބާރާތުގައި ޑަބަލްސްގެ ޗެމްޕިއަންކަން 11 ފަހަރު އަދި މިކްސް ޑަބަލްސްގެ ޗެމްޕިއަންކަން 12 ފަހަރު ހޯދައިފައެވެ.
