ގައުމެއްގެ މިނިވަންކަން ނެތިއްޔާ, އެގައުމެއް ގައުމެއްގެ ގޮތުގައި ނޯންނާނެ ކަމަށް ކުރީގެ ރައީސް މައުމޫން އަބްދުލް ގައްޔޫމް ވިދާޅުވެއްޖެ އެވެ.

މިނިވަން ދުވަހުގެ މުނާސަބަތުގައި ބުރާސްފަތި ދުވަހު ރައީސުލްޖުމްހޫރިއްޔާގެ ދެކަނބަލުން ބޭއްވި ހަފްލާގައި ރައީސް މައުމޫން ވިދާޅުވީ މިނިވަންކަމަކީ އެ ގައުމެއްގެ ދިރުން ބިނާވެފައިވާ އަސާސްކަމަށެވެ. އަދި މިނިވަންކަން ދިފާއުކޮށް ދަމަހައްޓަން ޖެހޭ ކަމަށާއި އެއްވެސް ހާލަތެއްގައި މިނިވަންކަމަކީ ދޫކޮށްލެވޭނެ އެއްޗެއް ނޫންކަމަށްވެސް ވިދާޅުވިއެވެ.

ރައީސް މައުމޫން ވިދާޅުވީ ހުރިހާ އެންމެންގެ އަޒުމަކަށް ވާން ޖެހޭނީ ދިވެހި ރާއްޖޭގެ މިނިވަންކަން ވަރުގަދަކޮށް، އެ ދެމެހެއްޓުމަށްޓަކާ ކުރެވެން ހުރި މަސައްކަތެއް ކުރުން ކަމަށެވެ.

ރާއްޖޭގެ މިނިވަން ދުވަސް ފާހަގަކުރާތާ މިއީ 54 ވަނަ އަހަރު އެވެ. ދިވެހިންނަށް މިނިވަންކަން ލިބުނީ 1965 ވަނަ އަހަރު އިނގެރޭސީންގެ ދަށުންނެވެ. މިނިވަންކަމުގެ އެއްބަސްވުމުގައި ސޮއިކުރެއްވީ އޭރުގެ ރައީސް އިބްރާހިމް ނާސިރު، ކޮޅުނބުގަ އެވެ.