މި އަހަރުގެ މިނިވަންދުވަހުގެ މުނާސަބަތުގައި ރައީސް އިބްރާހީމް މުޙައްމަދު ސޯލިހުއާއި، އެމަނިކުފާނުގެ އަނބިކަނބަލުން ފަޒްނާ އަޙްމަދު ބާއްވާ ރަސްމީ ބައްދަލުވުން ޖުލައި މަހުގެ 25 ވާ ބުރާސްފަތި ދުވަހުގެ ރޭ ބާއްވާ ގޮތަށް ހަމަޖައްސައިފިއެވެ.
މިނިވަން ދުވަހު ބާއްވާ މި ބައްދަލުވުން ބޭއްވުމަށް ހަމަޖެހިފައިވަނީ ދަރުބާރުގޭގައި ކަމަށް ރައީސް އޮފީހުން ބުނެފައިވެއެވެ.
ރައީސް ސޯލިހުގެ ދެކަނބަލުން ބާއްވާ މި ރަސްމީ ބައްދަލުވުމަށް ދައުލަތުގެ ތަފާތު ދާއިރާތަކުން ގިނަ އަދަދެއްގެ ބޭފުޅުންނަށް ބައިވެރިވެވޭނެ ގޮތަށް އެބޭފުޅުންނަށް ދަޢުވަތު އަރުވާގޮތަށް ވަނީ ހަމަޖެހިފައެވެ.
މީގެ އިތުރުން، ރައީސް އޮފީހުން މިހާރު ވަނީ މި ބައްދަލުވުމަށް ދައުވަތު ލިބިލައްވާ ބޭފުޅުންނަށް ދަޢުވަތު ކާޑު ފޮނުއްވަން ފަށާފައެވެ.
މި އަހަރުގެ މިނިވަންދުވަހުގެ މުނާސަބަތުގައި، ރައީސް އިބްރާހީމް މުޙައްމަދު ޞާލިޙް، ދިވެހި ޤައުމާ މުޚާޠަބު ކުރައްވާނެއެވެ. ރައީސް ޤައުމާ މުޚާޠަބު ކުރައްވާނީ، މިނިވަންދުވަހުގެ ހެނދުނު 10 ޖަހާއިރު ޚަބަރުފަތުރާ ވަސީލަތްތައް މެދުވެރިކުރައްވައެވެ.
