ހައްޖު ކޯޓާ ބެހުމުގައި އަމަލުކޮށްފައިވަނީ ހަމަހަމަ އުސޫލުން އިންސާފުވެރި ކަމާއެކު ކަމަށާއި، ކޮރަޕްޝަނަށް މަގުފަހިވާ ގޮތަށް އެއްވެސް ކަމެއް ކުރުމުގެ ޖާގަ މިސަރުކާރުން ނުދޭނެ ކަމަށް ރައީސުލްޖުމްހޫރިއްޔާގެ ނައިބް ރައީސް ފައިސަލް ނަސީމް ވިދާޅުވެއްޖެއެވެ.
މިއަހަރުގެ ހައްޖުގެ މަތިވެރި އަޅުކަން އަދާކުރުމަށްޓަކައި ޒަޢީ ގްރޫޕް ޕްރައިވެޓް ލިމިޓެޑުގެ ފަރާތުން ހައްޖަށް ފުރާ ހައްޖާޖީންނާއި ނައިބް ރައީސް ފައިސަލް ބައްދަކުރެއްވުމަށްފަހު ރާއްޖެއެމްވީއާ ވާހަކަފުޅު ދައްކަވަމުން ވިދާޅުވީ ސަރުކާރުން ކުރާ ކޮންމެ ކަމެއް ވެސް ކުރަމުންދަނީ އިންސާފުވެރިކޮށް ހަމަހަމަ އުސޫލުން ކަމަށެވެ.
ނައިބް ރައީސް ފައިސަލް ވިދާޅުވީ މިދިޔަ ސަރުކާރުން ހައްޖަށް މީހުން ގެންދިއުމަށްޓަކައި އަމަލުކޮށްފައިވާ ގޮތުން ވަރަށް ބޮޑަށް މަސްލަހަތު ގެއްލިފައިވާތީ މިސަރުކާރުން މަސައްކަތްކޮށްފައިވަނީ ވީހާ ވެސް ބޮޑަށް މަސައްކަތްކޮށްފައިވަނީ ރައްޔިތުންގެ މަސްލަހަތު އިސްކޮށްގެން ކަމަށެވެ. ހައްޖުގެ އެންމެހައި ކަންކަން ކުރިއަށްދާ ގޮތަށް ރައީސް އިބްރާހިމް މުހައްމަދު ސޯލިހު ވަރަށް ގާތުން ބައްލަވާ ކަމަށް ނައިބް ރައީސް ފާހަގަކުރެއްވިއެވެ.
ފާހަގަކޮށްލަން ބޭނުންވޭ ﷲ އިރާދަކުރެއްވިއްޔާ މިއަހަރު ހައްޖާޖީން ހައްޖަށް ފުރުމުގެ ކަންތައްތަކާއި އަދި ހައްޖު ކޯޓާ ބެހުމުގެ ކަންތައްތައް ވެސް މިދިޔައީ ވަރަށް ރަނގަޅަށް. ހުރިހާ ގޮތަކުން އަޅުގަނޑުމެން މިބަލަނީ ހައްޖާޖީން ހައްޖަށް މައްކާގެ އަޅުކަން އަދާ ކުރުމާއި އެބުރި އައުމަށް ދާންދެން ވެސް އެއީ އަޅުގަނޑުމެން ސަރުކާރުން ހަމަ ޚާއްސަ ސަމާލުކަމެއް ދީގެން ކުރަންޖެހޭ ކަމެއްގެ ގޮތުގައި.ނައިބް ރައީސް ވިދާޅުވި
ހައްޖަށް މީހުން ގެންދިއުމުގައި ބައެއް ގުރޫޕްތަކުން އިތުރަށް ފައިސާ ނަގާ މައްސަލައަށް އަލިއަޅުއްވާ ލައްވާ ނައިބް ރައީސް ފައިސަލް ވިދާޅުވީ ގާނޫނުތަކާއި ގަވާއިދުތަކާ ހިލާފަށް އެއްވެސް ފަރާތަކުން އެއްވެސް ކަމެއް ކުރިއަށް ގެންދާ ކަމަށްވާނަމަ އެކަންތައްތައް ސަރުކާރުން ވަރަށް ގާތުން ބަލަމުންދާނެ ކަމަށެވެ.
ނައިބް ރައީސް ވިދާޅުވީ ހުރިހާ ފަރާތްތަކުން ވެސް އަމަލުކުރަންޖެހޭނީ ގާނޫނާ އެއްގޮތަށް ކަމަށާއި، ހިލާފުވާނަމަ އަޅަންޖެހޭ ފިޔަވަޅުތައް އަޅަމުންދާނެ ކަމަށެވެ.
ރައްޔިތުންނަށް ދިމާވާ ކޮންމެ ދަތި އުނދަގޫ ކަންތައްތަކެއްގައި އެކުރަންޖެހޭ ކަންތައްތައް ބަލަންޖެހޭ ބެލުން އަބަދު ވެސް ސަރުކާރުން ބަލަމުންދާނެ. އެއް އަހަރުގެ ތަޖުރިބާއަށްފަހު އަނެއްއަހަރު އިރާދަކުރެއްވިއްޔާ ހުރިހާ ގޮތަކުން ހުރިހާ ކަމެއް އިތުރަށް ފުރިހަމަ ކުރުމަށްޓަކައި މަސައްކަތްތައް ކުރެވެމުންދާނެ.ނައިބް ރައީސް ވިދާޅުވި
ނައިބް ރައީސް ފައިސަލް ވިދާޅުވީ ސަރުކާރުގެ އަމާޒަކީ ވީހާ ވެސް ގިނަ ބަޔަށް ހައްޖަށް ދެވޭ ގޮތްވުން ކަމަށާއި، ހައްޖަށް ދާން ބޭނުންވާ މީހަކަށް ނުދެވި ގިނަ ދުވަސްތައްވުމަކީ ސަރުކާރުން ވެސް ކަންބޮޑުވާ ކަމެއް ކަމަށެވެ.
އެގޮތުން އަބަދު ވެސް ހައްޖު ކޯޓާ އިތުރުކުރުމުގެ މަސައްކަތް ކުރަމުން އަންނަ ނައިބް ރައީސް ވިދާޅުވިއެވެ.
މިދިޔަ އަހަރު ރާއްޖެއިން މީހުން ހައްޖަށް ގެންދިޔުމަށް ސައުދީން އިތުރު ކުރި 1000 ކޯޓާގެ ތެރެއިން ގިނަ ޖާގަތައް ޕީޕީއެމްގެ އިސް ފަރާތަކަށް ވަނީ ދީފައެވެ. އަދި މިއަހަރު ވެސް ހައްޖަށް ގެންދިއުމަށް ކުންފުނިތަކަށް ހުއްދިދިނީ އިންސާފުވެރި ނޫން ކަމަށް ބައެއް ކުންފުނިތަކުން އެސީސީއަށް މައްސަލަ ހުށަހަޅާފައެވެ.
