އިންޑިއަން އޯޝަން އައިލޭންޑް ގޭމްސް 2023 ވަނަ އަހަރު ރާއްޖޭގައި ބޭއްވުމަށް، ހުށަހަޅަންޖެހޭ ބިޑް ރަސްމީކޮށް ކުޅިވަރާއި ބެހޭ ވަޒީރު އަހުމަދް މަހުލޫފް ހޮނިހިރު ދުވަހު ހުށަހަޅައި ދެއްވައިފިއެވެ.
މޮރިޝަސް އިންޓަރކޮންޓިނެންޓަލް ހޮޓަލުގައި ހޮނިހިރު ދުވަހު ހެނދުނު ބޭއްވި ބިޑް ހުށަހެޅުމުގެ ހަފްލާގައި ރާއްޖޭގެ އިތުރުން މަޑަގަސްކަރ އަދި ކޮމޮރޮސް އިންވެސް ވަނީ ރަސްމީކޮށް ބިޑް ހުށަހަޅައިފައެވެ.
ރާއްޖޭގެ ބިޑް ހުށަހަޅުއްވަމުން މިނިސްޓަރ މަހުލޫފް ވިދާޅުވީ މި މުބާރާތަކީ ދިވެހިންގެ ހިތްތަކާއި ގުޅިފައިވާ މުބާރާތެއް ކަމަށާއި، ދިވެހިރާއްޖެއިން އެންމެ ފުރަތަމަ ވާދަކުރި ބައިނަލްއަގްވާމީ މުބާރާތަކީ އައިއޯއައިޖީ ކަމަށެވެ. މީގެ އިތުރުން މަހުލޫފް ވިދާޅުވީ ދިވެހިން ފުޓުބޯޅައިގައި ޖެހި އެންމެ ފުރަތަމަ ލަނޑު ޖަހައިފައިވަނީ އައިއޯއައިޖީގައި ކަމަށެވެ.
މިނިސްޓަރ މަހުލޫފް އިތުރަށް ވިދާޅުވީ ކަނޑު ހުރަސްކޮށް ދިވެހިން މި މުބާރާތުގައި ބައިވެރިވާން ދަތުރުކުރާތާ 40 އަހަރުވެފައިވާ ކަމަށާއި މި މުބާރާތް ފެށުނީއްސުރެ ދިވެހިން މި މުބާރާތުގައި ބައިވެރިވަމުން ދާކަމީ މި މުބާރާތް 2023 ވަނަ އަހަރު ރާއްޖޭގައި ބާއްވަން ފުރުސަތު ދޭންވީ ފަހަރުކަމަށެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު މި މުބާރާތް 2023 ވަނަ އަހަރު ރާއްޖޭގައި ބޭއްވުމަށް ވަރަށް ބޮޑު އަހައްމިޔަތު ކަމެއްދެއްވައެވެ. އެގޮތުން ރައީސްގެ މަންދޫބުންގެ ގޮތުގައި ޖުލައި މަހުގެ ހަތްވަނަ ދުވަހުން ފެށިގެން ހާރިޖީ ވަޒީރު އަބްދުﷲ ޝާހިދުގެ އިތުރުން ކުޅިވަރާއި ބެހޭ ވަޒީރު އަހްމަދު މަހުލޫފް އަންނަނީ މުބާރާތުގައި ވާދަކުރާ ގައުމުތަކަށް ގޮސް އެގައުމުތަކުގެ އިސްވެރިންނާއި ބައްދަލުކުރައްވާ، އެގައުމުތަކުގެ ތާއީދު ހޯދުމަށް މަސައްކަތް ކުރަމުންނެވެ.
