އައްޑޫ ސިޓީގެ ހުޅުމީދޫ ގެއަކުން 1،300 ރުފިޔާ އާއި ގަހަނާ ވަގަށް ނެގި ކަމުގެ ތުހުމަތުގައި ހައްޔަރު ކުރި މީހާގެ ބަންދުގެ މުއްދަތަށް ދިހަ ދުވަސް ޖަހައިފިއެވެ.
ފުލުހުން ބުނީ، ހުޅުމީދޫ ގެއަކުން ވައްކަން ކޮށްފައިވާ ކަމަށް ހުށައެޅިފައިވާ މައްސަލަ އަކާއި ގުޅިގެން ބުދަ ދުވަހު އައްޑޫ ފުލުހުން ހިންގި އޮޕަރޭޝަނެއްގައި ފިރިހެނަކު ހައްޔަރު ކޮށްފައިވާ ކަމަށެވެ. ހައްޔަރު ކޮށްފައިވަނީ 31 އަހަރުގެ މީހެކެވެ.
އެމީހާގެ ބަންދާ މެދު ގޮތެއް ނިންމުމަށް ހުޅުމީދޫ މެޖިސްޓްރޭޓް ކޯޓުން އޭނާގެ ބަންދުގެ މުއްދަތަށް ދިހަ ދުވަސް ވަނީ ޖަހާފައެވެ. އެގެއިން ވަގަށް ނަގާފައިވަނީ 1300 ރުފިޔާގެ އިތުރުން އަތުގައި އަޅާ ގަހަނާއެވެ.
ފުލުހުންގެ ތަފާސް ހިސާބުތަކުން ދައްކާ ގޮތުން މި އަހަރުގެ މިހާތަނަށް ވައްކަމުގެ 249 މައްސަލައެއް ވަނީ ފުލުހަށް ހުށައަޅާފައިވެއެވެ. ނިމިގެން ދިޔަ އަހަރު ވައްކަމުގެ 537 މައްސަލަ ލިބިފައިވާ ކަމަށް ފުލުހުން ބުންޏެވެ.
