ޔޫރަޕް އިއްތިހާދު (އީޔޫ) ގެ ކައުންޓަރ ޓެރަރިޒަމް ކޯޑިނޭޓަރު ގިލްސް ޑެ ކެރްޗޯވޭ ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ބައްދަލުކުރައްވައިފިއެވެ.

މި ބައްދަލުކުރެއްވުން އޮތީ ރައްޔިތުންގެ މަޖިލީހުގެ އިދާރާގައެވެ.

މި ބައްދަލުކުރެއްވުމުގައި އީޔޫއިން ކައުންޓަރ ޓެރަރިޒަމް ހުއްޓުވުމަށް ކުރައްވަމުން އަންނަ މަސައްކަތްތަކާއި ގުޅޭ ތަފްސީލް، ކެރްޗޯވޭ ވަނީ ރައްޔިތުންގެ މަޖިލީހުގެ ރައީސާއި ހިއްސާކުރައްވާފައެވެ.

ޖުލައި މަހުގެ 11 އިން 16 އަށް ކެރްޗޯވޭ ރާއްޖެއަށް ކުރައްވާ މި ދަތުރުފުޅަކީ ސަލާމަތީ ކަންތައްތައް އިތުރަށް ފުޅާކޮށް ތަޖުރިބާ ހިއްސާކުރުން އިތުރަށް ހަރުދަނާ ކުރުމަށް އެއްބާރުލުން ދިނުމުގެ ގޮތުން ކުރައްވާ ދަތުރުފުޅެކެވެ.

މި ދަތުރުފުޅުގައި ކެރްޗޯވޭ ވަނީ ދިވެހި ސަރުކާރުގެ އިސް ފަރާތްތަކާއި ސަލާމަތީ ކަންތައްތައް ބަލަހައްޓާ އިސްބޭފުޅުންނާ ބައްދަލު ކުރައްވާފައެވެ. އަދި ދެ ގައުމުގެ ޑިޕްލޮމެޓިކް ޖަމާއަތުގެ މަންދޫބުންނާ ވެސް މި ދަތުރުފުޅުގައި ކެރްޗޯވޭ ބައްދަލު ކުރެއްވުމަށް ވަނީ ހަމަޖެހިފައެވެ.

ގިލްސް ޑެ ކެރްޗޯވޭ އީޔޫ ގެ ކައުންޓަރ ޓެރަރިޒަމް ކޯޑިނޭޓަރު މަގާމު ފުރައްވާތާ 10 އަހަރަށް ވުރެ ގިނަ ދުވަސް ވަނީވެފައެވެ.