ހޮނިހިރު ދުވަހުގެ ރޭ 1:10 ހާއިރު މަޖީދީމަގާ ސައްޔިދު ކަލޭފާނުމަގު ގުޅުނު ހިސާބުގައި ހިނގި ނުރައްކާތެރި އެކްސިޑެންޓްގައި އަނިޔާވި ދެމީހުންގެ ތެރެއިން އެކަކަށް އައިޖީއެމްއެޗްގައި އަދި އަނެއްމީހާއަށް އޭޑީކޭގައި ފަރުވާދެމުންގެންދާ ކަމަށް މޯލްޑިވްސް ޕޮލިސް ސާވިސްއިން މައުލޫމާތު ދީފިއެވެ.

މި ހާދިސާގައި އައިޖީއެމްއެޗްގައި ފަރުވާދެމުން އަންނަނީ 25 އަހަރުގެ ބަންގްލަދޭޝްގެ ފިރިހެނަކަށެވެ.

ބޮޑު އަނިޔާއެއް ލިބިފައިވަނީ ސައްޔިދުކަލޭފާނު މަގުން ވަން ވޭ އާ އިދިކޮޅަށް ދުއްވާފައި ދިޔަ ސައިކަލުގައި އިން ބަންގްލަދޭޝްގެ ދެމީހުންގެ ތެރެއިން ފިރިހެނަކަށް ކަމަށް މަންޒަރުދުއް މީހުންނާއި ހަވާލާދީ ނޫސްތަކުގައި ވަނީ ރިޕޯޓްކޮށްފައެވެ. އަދި މަޖީދީމަގުން ބާރު ސްޕީޑުގައި ދުއްވާފައި ދިޔަ ވޭވް ބްރޭންޑުގެ ސައިކަލުގައި ތިބީ ދެ ދިވެހީން ކަމަށާއި އަދި އޭގެތެރެއިން އެކަކު ފިލާފައިވާ ކަމަށް ވެސް މަންޒަރުދުއް މީހުންނާއި ހަވާލާދީ ނޫސްތަކުގައި ވަނީ ރިޕޯޓް ކޮށްފައެވެ.

މި މައްސަލަ މޯލްޑިވްސް ޕޮލިސް ސާރވިސްއިން އަންނަނީ އިތުރަށް ތަހުގީގް ކުރަމުންނެވެ.