އައްޑޫ އިންޓަރނޭޝަނަލް އެއާޕޯޓްސް އިންވެސްޓްމެންޓް ކުންފުނީގެ ބޯޑު މެމްބަރުން ސްޓޭޓް އޯންޑް އެންޓާރޕްރައިޒެސް (އެސްއޯއީ) ކޮމިޓީއަށް ހާޒިރު ކުރުމަށް ފޭދޫ ދާއިރާގެ މެމްބަރު މުހައްމަދު ނިހާދް ހުށަހަޅުއްވައިފިއެވެ.

ބުދަ ދުވަހުގެ އެސްއޯއީ ކޮމެޓީގެ ބައްދަލުވުމުގައި ވާހަކަ ދައްކަވަމުން ނިހާދު ވިދާޅުވީ އެ ކުންފުނީގެ ބޯޑު މެމްބަރުން ހާޒިރު ކުރުމަށް ހުށަހެޅުއްވީ އައްޑޫގެ އެއާޕޯޓް ވީރާނާ ވެގެން ދާއިރު ވެސް އެ ކުންފުނިން އެއާޕޯޓު މަރާމާތު ކުރުމަށް އެއްވެސް މަސައްކަތެއް ކޮށްފައި ނުވާތީ ކަމަށެވެ.

ނިހާދު އެހެން ވިދާޅުވީ އައްޑޫގެ ފަތުރުވެރިކަން ތަރައްގީ ކުރުމަށްޓަކައި އޮތް މައި ދޮރާއްޓަކީ އެއާޕޯޓު ކަމަށްވާއިރު އެތަން ފުރިހަމަ ގޮތެއްގައި އޮޕަރޭޓް ކުރެވޭތަން ފެނިގެން ނުދާތީ ކަމަށެވެ. އެއާޕޯޓުގެ މެއިންޓެނެންސް ބެލެހެއްޓުން ދަށްވުމާއި އެއާޕޯޓު އޮޕަރޭޝަންސް ގައި އެކި ފަރާތްތަކަށް ތަފާތު ކުރުންތަކެއް ގެންގުޅޭ ކަމަށް ފާހަގަ ކުރެވިފައިވާ ކަމަށް ވެސް ނިހާދު ވިދާޅުވިއެވެ.

އެއާޕޯޓް އިންޓާރނޭޝަނަލް އެއާޕޯޓު ތަރައްގީ ކުރުމުގެ މަޝްރޫޢުތައް ބެލުމަށް ފަހު ފަސް ދުވަހުގެ ނޯޓިސް އެއް ދިނުމަށް ކޮމެޓީއިން ވަނީ ނިންމަވާފައެވެ.