ރާއްޖެއަށް އެންމެ ބޮޑުވެފައިވާ ކުނީގެ މައްސަލައަށް ހައްލެއް ހޯދުމަށް ކަމާއި ބެހޭ ވުޒާރާތައް ރައްޔިތުންގެ މަޖިލީހުގެ އެންވަޔަރަމަންޓް އެންޑް ކްލައިމެޓް ޗޭންޖް ކޮމިޓީއަށް ހާޒިރުކުރުމަށް ނިންމައިފިއެވެ.
ހޯމަ ދުވަހު ބޭއްވި ކޮމިޓީގެ ބައްދަލުވުމުގައި ކުނި މެނޭޖް ކުރުމަށް ހުރި ގޮންޖެހުންތަކާއި އަދި ކުނި މެނޭޖް ކުރުމުގައި ދިމާވާ މައްސަލަތަކަކީ ކޮބައިތޯ ވަކިން ތަފްސީލްކޮށް ދިރާސާކޮށް ބެލުމަށްޓަކައި އެންވަރަމަންޓް މިނިސްޓްރީއާއި އެންވަޔަރަމަންޓް ޕްރޮޓެކްޝަން އެޖެންސީ އަދި ވޭސްޓް މެނޭޖްމަންޓް ކޯޕަރޭޝަން ކޮމިޓީއަށް ހާޒިރުކުރުމަށް ވަނީ ނިންމާފައެވެ.
އެ ބައްދަލުވުމުގައި މާލެއާއި އަތޮޅު ތެރޭގައި ވެމްކޯއިން ކުރަމުންދާ މަސައްކަތްތައް ބަލާ،ކުނީގެ މައްސަލަ މިހާރު ގޮސްފައި އޮތް މިންވަރާއި، އެކަމަށް ކުރިމަތިވެފައި އޮތް ގޮންޖެހުންތަކާއި އެކަމުގައި ރައްޔިތުންގެ މަޖިލީހަށް ކުރެވޭނީ ކޮންކަމެއްތޯ ބެލުމަށް ވަނީ ނިންމާފައެވެ.
ބޭރުގެ އެހީ އެންމެ ބޮޑަށް ލިބޭ އެއް ދާއިރާއަކީ ވޭސްޓް މެނޭޖްމަންޓަށް ކަމަށް ރިޕޯޓްތަކުން ދައްކާ ކަމަށް ކޮމިޓީގެ މުގައްރިރު އަހުމަދު ސަލީމް ވިދާޅުވިއެވެ.
" ދިވެހިރާއްޖޭގެ ކުނީގެ މައްސަލަ ހައްލުކުރުމަށްޓަކައި ސަރަހައްދީ ކުނި މެނޭޖް ކުރާ ސެންޓަރުތަކެއް ވެސް ހެދި އެތަންތަން މަސައްކަތް ކުރޭތޯ ނުވަތަ ނުކުރަނީ ކީއްވެތޯ ބަލާހިސާބަށް އާދެވިއްޖެ ކަމަށް ދެކެން. ރަށުފެންވަރުގައި މިކަން ހައްލުނުކުރެވިގެން މިއުޅެނީ ކީއްވެގެންތޯ ބަލަން ޖެހޭ" ސަލީމް ވިދާޅުވިއެވެ.
