ނޫސްވެރިޔާ އަހުމަދު ރިލްވާން ގެއްލިފައިވާ މައްސަލައާއި ގުޅޭގޮތުން މިހާތަނަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން ކޮށްފައިވާ މަސައްކަތްތަކާއި ގުޅޭ ރިޕޯޓް އާދިއްތަ ދުވަހު ރައްޔިތުންގެ މަޖިލީހުގެ އިދާރާއާއި ހިއްސާކޮށްފައިވާ ކަމަށް އެކޮމިޝަނުން ބުނެފިއެވެ.
އެޗްއާރު ސީއެމުން ބުނީ މި މައްސަލައިގައި ކްރިމިނަލް ކޯޓުގައި ކުރިއަށް ދިޔަ ޝަރިއަތުގެ މަޖިލިސްތަކުގެ އަޑުއެހުމަށް ކޮމިޝަނުން ކޯޓަށް ހާޒިރުވެފައިވާ ކަމަށެވެ.
މީގެ އިތުރުން މި މައްސަލައިގައި ކްރިމިނަލް ކޯޓުން ކޮށްފައިވާ ހުކުމާއި، ފުލުހުންގެ ތަހުގީގާއި ގުޅޭގޮތުން ކޮމިޝަނަށް ފާހަގަކުރެވޭ ކަންކަމާއި ގުޅޭގޮތުން މަޝްވަރާ ކުރުމަށް މޯލްޑިވްސް ޕޮލިސް ސާރވިސް އާއި ޕްރޮސިކިއުޓަރ ޖެނެރަލްގެ އޮފީހާއިއެކު ބައްދަލުވުންތައް ބޭއްވިފައިވާ ކަމަށް އެޗްއާރުސީއެމުން މައުލޫމާތު ދެއެވެ.
މިނިވަން ނިއުސްގެ ނޫސްވެރިޔާ އަހުމަދު ރިލްވާން އަބްދުﷲ ގެއްލިފައި ވަނީ 8 އޮގަސްޓް 2014 ގައެވެ.
