ރައީސް އޮފީހުގެ ސިޔާސީ މަޤާމަކަށް މަބްރޫކް އަޒީޒް އައްޔަންކޮށްފި އެވެ.

ނިމިދިޔަ ރައްޔިތުންގެ މަޖިލީހުގެ އިންތިހާބުގައިވެސް ވާދަކުރެއްވި މަބްރޫކް އައްޔަންކުރައްވާފައިވަނީ ރައީސް އޮފީހުގެ ކޮމިއުނިކޭޝަންސް އަންޑަ ސެކެރެޓަރީކަމުގެ މަގާމަށެވެ. އެނގިފައިވާގޮތުގައި އޭނާ އެ މަޤާމަށް އައްޔަންކޮށްފައިވަނީ މީގެ 3 ދުވަސްކުރިންނެވެ.

މަބްރޫކް އައްޔަންކުރެއްވިި މަޤާމަކީ ނައިބް މިނިސްޓަރ ފެންވަރުގެ މަޤާމެކެވެ.

މަބްރޫކްއަކީ އެމްޑީޕީގެ އިސް ސަފުގައި ހަރަކާތްތެރިވާ ފަރާތެކެވެ. އެގޮތުން ނިމިދިޔަ އާއްމު އިންތިހާބު ގައި އޭނާ ވަނީ އެމްޑީޕީގެ ޓިކެޓްގައި ފެލިދޫ ދާއިރާ އަށް ވާދަކުރައްވާ ނަކާމިޔާބީޔާ ކުރިމަތިލައްވަން ޖެހިވަޑައިގެންފައެވެ. އެ ގޮނޑި ކާމިޔާބު ކުރެއްވި ޕީއެންސީގެ ފަރާތުން ވާދަކުރެއްވި އިބްރާހީމް ފަޒުލް ރަޝީދެވެ. ފަޒުލް ދާއިރާގެ ގޮނޑި ކާމިޔާބު ކުރެއްވި 54 ވޯޓުން ކުރި ހޯއްދަވައިގެންނެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް އިބްރާހިމް މުހައްމަދު ސޯލިހް ވިދަޅުވީ، މި ސަރުކާރުގެ އަށް މަސް ތެރޭގައި އުފައްދަވާފައި ވަނީ 334 ސިޔާސީ މަގާމު ކަމަށެވެ. އެމަނިކުފާނު ވިދާޅުވި ގޮތުގައި ކުރީގެ ރައީސް އަބްދުﷲ ޔާމީންގެ ސަރުކާރުގައި 465 ސިޔާސީ މަގާމް އުފައްދަވާފައިވެ އެވެ. އަދި ރައީސް ސޯލިހް ވިދާޅުވީ ނިމިދިޔަ ސަރުކާރަށްވުރެ، އެމަނިކުފާނުގެ ސަރުކާރުގެ ސިޔާސީ މަޤާމުތައް އިތުރުވިޔަ ނުދެއްވާނެ ކަމަށެވެ.