ކުރީގެ ނައިބް ރައީސް އަހްމަދު އަދީބް ބޭސްފަރުވާއަށް ފަހު އެނބުރި ރާއްޖެ ވަޑައިގަންނަވައިފިއެވެ.

ކަރެކްޝަނަލް ސާރވިސް އިން އަދީބް ބޭސްފަރުވާއަށް އިންޑިއާ އަށް ފުރުމުގެ ހުއްދަދިނުމާއެކު، އޭނާ އިންޑިއާއަށް ފުރާވަޑައިގެންނެވީ އަނބިކަނބަލުން މަރިޔަމް ނަޝްވާއެކު މިދިޔަ މަހުގެ 14 ވަނަ ދުވަހު އެވެ.

ފުރަތަމަ ދެވުނު ދިހަ ދުވަހުގެ މުއްދަތަށް، ކަރެކްޝަންސް އިން ދިހަ ދުވަސް އިތުރު ކޮށްދީފައިވެއެވެ. ދުވަސް އިތުރު ކޮށްދެއްވި ސަބަބު ބަޔާންކުރަމުން ކަރެކްޝަންސްއިން އޭރު ބުނެފައިވަނީ، އަދީބުގެ ބޭސްފަރުވާގެ މުއްދަތު އިތުރުކޮށްދިނީ ފުރަތަމަ ދެވުނު މުއްދަތުގެ ތެރޭގައި އަދީބުގެ ބޭސްފަރުވާގެ ކަންކަން ފުރިހަމަވެފައި ނުވާތީ ކަމަށެވެ.

އަދީބަށް ފުރަން ހުއްދަ ދިނުމުން ސަރުކާރަށް ގިނަ ފާޑުކިޔުންތަކެއް އަމާޒުވެފައިވާ އިރު، އޭގެ ރައްދުގައި ހޯމް މިނިސްޓަރު ޝޭހް އިމްރާން އަބްދުﷲ ވިދާޅުވީ އަދީބަށް ފިއްލަވަން ފުރުސަތު ނުދެއްވާނެ ކަމަށާއި، ފިއްލަވައިފި ނަމަ އެކަމުގެ ފުރިހަމަ ޒިންމާ ނަންގަވާނެ ކަމަށެވެ.

އިންޑިއާގެ ޕޫނާގައި ހުންނަ ރޫބީ ހޯލް ކްލިނިކް ކިޔާ ހޮސްޕިޓަލުގައި ގުލަކޯމާ ބައްޔަށް ފަރުވާ އަދީބް ހޯދާފައިވާއިރު، ހަމަސް ފަހުން ޑޮކްޓަރަށް އަލުން ޑޮކްޓަރަށް ދެއްކުމަށް ވަނީ ލަފާދީފައެވެ.

އިންޑިއާއިން ރާއްޖެ ފުރާވަޑައިގަތުމުގެ ކުރިން އަދީބް ކުރެއްވި ޓްވީޓެއްގައި ވިދާޅުވީ، ޒިންމާއިން ރެކިގަތުމާއި ފިލައިގެން ދިޔުމަކީ އެއެވެސް އުސޫލެއް ނޫން ކަމަށާއި، ހިދުމަތުގައި އުފުލަން ޖެހުނު ކޮންމެ ޒިންމާއެއް އުފުލައި، ހުރަސްތައް ގިރާކޮށް ކޮންމެ ކަމެއްގައިވެސް ކުރިމަތިލައްވާނެ ކަމަށެވެ.

ބޭސްފަރުވާއަށް ވަޑައިގެން އުޅުއްވަނިކޮށް، ސުޕްރީމް ކޯޓުން ވަނީ އަދީބުގެ ޕާސްޕޯޓް ހިފަހައްޓަން ވަގުތީ އަމުރެއް ވެސް ނެރެފައެވެ. ސުޕްރީމް ކޯޓުން އެ އަމުރު ނެރުނީ އެމްއެމްޕީއާރްސީގެ ހިޔާނާތުގެ މައްސަލައިގައި އިއްވި އަށް އަހަރު ދުވަހުގެ ޖަލު ހުކުމް ހައި ކޯޓުން ބާތިލް ކުރުމުން، ދައުލަތުން އިސްތިއުނާފުކުރަން ސުޕްރީމް ކޯޓަށް ހުށައެޅުމާއި ގުޅިގެންނެވެ.