މި އަހަރު ބޮލީވުޑް ފިލްމުތަކުގެ ތެރެއިން ބެލުންތެރިން އެންމެ އިންތިޒާރުކޮށްގެން ތިބި ފިލްމަކަށް ވެގެންދާނީ ޕްރާބާސްއާ ޝްރައްދާ ކަޕޫރް ފެނިގެންދާ ''ސާހޯ'' އަށެވެ.

ސާހޯ ފިލްމުގެ ޕޯސްޓަރު އާއްމުންގެ ތެރެއަށް ޖޫން މަހުގެ 11 ވަނަ ދުވަހު ދޫކޮށްލާފައިވާއިރު ސާހޯގެ ފިލްމުގެ ފުރަތަމަ ލަވަ '' ސައިކޯ ސައްޔާން'' ގެ ޓީޒާ ހުކުރު ދުވަހު މި ވަނީ ރިލީޒް ކޮށްފައެވެ.

އަށާވީސް ސިކުންތުގެ އެ ޓްރެއިލާ ފެނިގެންދާނީ ޝްރާއްދާއާ ޕްރަބާސްއާ ދެމީހުންގެ ނެށުމެކެވެ. އެއް ދުވަސް ތެރޭގައި ތިން މިލިއަން ވިއުސް ލިބިފައިވާ އެ ޓީޒާ އަށް ގިނަ ބައެއްގެ ތައުރީފު ވަނީ ލިބިފައެވެ.

''ސައިކޯ ސައްޔާން'' ލަވަ ކިޔާފައިވަނީ ޝްރައްދާގެ ހާފްގާލް ފްރޭންޑްގެ '' ބާރިޝް ލަވަ ކިޔާފައިވާ ތަނިޝްކް ބަގްޗީއެވެ. ފިލްމުގެ ފުރިހަމަ ލަވަ ރިލީޒް ކުރާނީ، ހޯމަ ދުވަހުއެވެ.

މި އަހަރުގެ އޮގަސްޓް މަހުގެ 15 ވަނަ ދުވަހު ރިލީޒް ކުރަން ހަމަޖެހިފައިވާ މި ފިލްމަކީ އެކްޝަން ތްރީލާ ފިލްމެކެވެ.

ހައިދްރާއާބާދުގައި ހުންނަ ޔޫވީ ކްރިއޭޝަންސް ޕްރޮޑަކްޝަން އާއި މަޝްހޫރު ޓީ ސީރީސްއާ ގުޅިގެން ހަދާ މި ފިލްމުގައި ގިނަ އަދަދެއްގެ ކާސްޓުންތަކެއް ހިމެނެއެވެ. ސަޕޯޓިން ރޯލުން ނީލް ނިތިން މުކޭޝް، ތަމަޅަ ފިލްމުތަކުން ފެނިގެންދާ އަރުޖުން ވިޖޭގެ އިތުރުން ޖެކީ ޝްރޯފް ވެސް ހިމެނެއެވެ.

އިތުރު ކާސްޓުންގެ ތެރޭގައި، އެވެލިން ޝަރްމާ، ފެޝަން ޑިޒައިނަރު މަންދީރާ ބޭދީ، ޗަންކީ ޕާންޑޭގެ އިތުރުން ތެލަގޫ ކޮމޭޑިއަން ވެނެއްލާ ކިޝޯރް ވެސް ހިމެނެއެވެ.

"ސާހޯ" ހަދާފައި ވަނީ 300 ކްރޯޑް ރުޕީސްގެ ބަޖެޓަކުންނެވެ. މިއީ ޕްރަބާސް އެންމެ ފަހުން ކުޅެފައިވާ ''ބާހުބަލީ 2" އަށް ވުރެ ބޮޑު ހޭދައެއް ކޮށްގެން ހަދާފައިވާ ފިލްމެކެވެ.

މި ފިލްމު ހިންދީ، ތަމަޅަ އަދި ތެލަގޫ ބަހުން ނެރުމަށް ވަނީ ހަމަޖެހިފައެވެ. ފިލްމު ލިޔެ ޑައިރެކްޓްކޮށްފައި ވަނީ ތެލަގޫ ޑައިރެކްޓަރު ސުޖީތް ރެޑީއެވެ.