ފެމިލީ ކޯޓުގެ ގާޒީ ހުޒައިފާ މުހައްމަދާ ދެކޮޅަށް ޖުޑީޝަލް ސާވިސް ކޮމިޝަން (ޖޭއެސްސީ) އަށް ހުށަހަޅާފައިވާ ސުލޫކީ މައްސަލައަކީ އެއްވެސް އަސާސެއް ނެތް މައްސަލައެއް ކަމަށް ވާތީ އެ މައްސަލަ ނުބަލަން އެ ކޮމިޝަނުން ނިންމައިފި އެވެ.
އެކަމާއި ގުޅިގެން ޖޭއެސްސީން ބުނީ ހުޒައިފާއާ ދެކޮޅަށް ހުށަހަޅާފައި އޮތީ އެއްވެސް އަސާސެއް ނެތް މައްސަލައެއް ކަން ކޮމިޝަންގެ ތަހުގީގު ކޮމިޓީ އަށް އެނގުނީ ފެމިލީ ކޯޓުގެ އެހެން ގާޒީއަކާ ގުޅޭ މައްސަލައެއްގެ ތަހުގީގުގެ ތެރެއިން ކަމަށެވެ. ހުޒައިފާއާ ބެހޭ ގޮތުން ޝަކުވާ ހުށަހެޅި މީހާގެ މައްސަލައެއް ޖުޑީޝަލް އެޑްމިނިސްޓްރޭޝަނުން ބަލައި، އޭނާ ވަޒީފާ އިން ވަކިކޮށްފައި އޮތުމުން، ހުޒައިފާއާ ދެކޮޅަށް އޭނާ ހުށަހެޅި މައްސަލައަކީ އެއްވެސް އަސާސެއް އޮތް މައްސަލައެއް ކަމަށް ނުދެކޭ ކަމަށް ޖޭއެސްސީން ވަނީ ނިންމާފައިވެ އެވެ.
ހުޒައިފާގެ މައްސަލަ ޖޭއެސްސީއަށް ހުށައަޅާފައިވަނީ ޖޫން މަހުގެ 19 ވަނަ ދުވަހު އެވެ.
ފެމިލީ ކޯޓްގެ އިސް ގާޒީ ހަސަން ސައީދު މިދިޔަ ހަފުތާގައި ސަސްޕެންޑްކޮށް އޭނާގެ މައްސަލަ ޖޭއެސްސީން ވަނީ ބަލަން ފަށައިފައެވެ. އެނގިފައިވާ ގޮތުގައި ހުޒައިފާގެ މައްޗަށް ހުށައަޅާފައިވާ މައްސަލައިގައި އެއްވެސް އަސާސެއް ނެތްކަން ޖޭއެސްސީއަށް އެނގުނީ އިސް ގާޒީ ހަސަން ސައީދުގެ މައްސަލައިގެ ތަހުގީގު ތެރެއިންނެވެ.
