ނެޝަނަލް ޗެމްބަރ އޮފް ކޮމާރސް ނުވަތަ އާއްމު ނަމުންނަމަ ވިޔަފާރިވެރިންގެ ޖަމްއިއްޔާ، ހިންގަންޖެހޭ އުސޫލުން އެއްކިބާވެ، ސިޔާސީ ކުލަޖެހިފައިވާތީ އެކަމުގެ ކަންބޮޑުވުން ރައްޔިތުންގެ މަޖިލީހުގެ މެމްބަރުން ފާޅުކޮށްފިއެވެ.
މެމްބަރުންގެ އެކަމުގެ ކަންބޮޑުވުން ފާޅުކޮށްފައިވަނީ، ދިވެހިރާއްޖޭގެ ޤައުމީ ޗެމްބަރ އޮފް ކޮމަރސް އެންޑް އިންޑަސްޓްރީސްގެ ބިލްގެ އިބްތިދާއީ ބަހުސް މަރްހަލާގައި ވާހަކަފުޅު ދައްކަވަމުންނެވެ. މި ބިލަކީ ސަރުކާރުގެ ފަރާތުން މަރަދޫ ދާއިރާގެ މެމްބަރު އިބްރާހިމް ޝަރީފް ހުށަހެޅުއްވި ބިލެކެއެވެ.
ޗެމްބަރ އޮފް ކޮމާރސް އަކީ ވިޔަފާރިވެރިންގެ ހައްގުތަށް ހިމާޔަތްކޮށް ދިވެހިރާއްޖެ ބައިނަލްއަގްވާމީ މައިދާނުގައި ތަމްސީލްކޮށް, ދިވެހި ވިޔަފާރިވެރިންގެ ކަންކަން ކުރިއަރުވައި ގައުމުގެ އިގްތިސާދު ކުރިއެރުވުމަށްޓަކައި ކުރަންޖެހޭ މަސައްކަތް ކުރުމަށް އުފައްދާފައިވާ މުއައްސަސާއެކެއެވެ. ނަމަވެސް މިހާތަނަށް އައިއިރު، އެކަންތައް ކުރަން މުއައްސަސާ ނުކުޅެދިފައިވާކަން މެމްބަރުން ވަނީ ފާހަގަކުރައްވާފައެވެ. ޗެމްބަރު އޮފް ކޮމާރސް އަށް އެހެންވާން ޖެހުނީ ކްލަބް ޖަމްއިއްޔާ އެއްގެ ގޮތުގައި، އެ ޗެމްބަރު ބާއްވައިގެން ކުރިއަށް ދިޔުމުން ކަން މެމްބަރުން ވަނީ ފާހަގަކުރައްވާފައެވެ.
ބިލް ހުށަހަޅުއްވަމުން، ޝަރީފް ވިދާޅުވީ ބިލް ހުށަހަޅަން ހިތްވަރު ލިބިވަޑައިގެންނެވީ "ބާރ ކައުންސިލް" ބިލް މަޖިލީހުން ފާސްކުރުމުން ކަމަށެވެ. މެމްބަރު ޝަރީފް ވިދާޅުވީ މި ބިލް ފާސްވުމަކުން ދިވެހި ދައުލަތުން އެއްވެސް ހަރަދެއް ކުރާކަށް ނުޖެހޭނެ ކަމަށެވެ. ނަމަވެސް ބިލްގެ ސަބަބުން ޗެމްބަރު ހިންގަންޖެހޭނެ ގާނޫނީ އޮނިގަނޑެއް އެކުލެވިގެންދާނެ ކަމަށެވެ.
"އެހެން ނަމަވެސް ގާނޫނުގައި އޮނިގަނޑެއްގެ ތެރެއިން އެ ޗެމްބަރު ހިންގުމާއި، ޗެމްބަރުން އަދާކުރަންޖެހޭ މަސްއޫލިއްޔަތުތައް އަދާކުރުމަށް ފަހި ކުރުމަށްޓަކައި ވަކި ތަރްތީބަކުން ވަކި ގޮތަކަށް ރެގިއުލޭޓް ކުރެވިގެން ސަރުކާރުންވެސް ޒިންމާދާރު ކުރެވިގެން ހިގާ ތަނަކަށް ވުން." ޝަރީފް ވިދާޅުވިއެވެ.
އައްޑޫ ހުޅުދޫ ދާއިރާގެ މެމްބަރު އިލްޔާސް ލަބީބް ވަނީ މި ބިލަކީ މުހިއްމު ބިލެއް ކަމަށް ދެކިވަޑައިގަންނަވާ ކަމަށް ވިދާޅުވެފައެވެ.
އިލްޔާސް ވިދާޅުވީ ޗެމްބަރ އޮފް ކޮމާރސްގައި ތިއްބަވާ ބޭފުޅުން، އެބޭފުޅުންގެ ނުފޫޒު ބޭނުންކުރައްވައިގެން ގިނަ ކަންތައްތަކެއް ކުރަމުން އަންނަ އަޑުތައް އިވިގެން ގޮސްފައިވާ ކަމަށެވެ. ނެޝަނަލް ޗެމްބަރ އޮފް ކޮމާރސް ފާއިތުވި ތަނުގައި ހިގާފައިވަނީ ވިޔަފާރިވެރިންނަށް ފާއިދާ ހުރި ގޮތަކަށް ނޫން ކަމަށާއި، އެތަން ހިންގާފަ
އިވާ ސިޔާސީ ހާއްޔެއް ގޮތުގައި ކަމަށެވެ. މުއައްސަސާ އޮތުމުގެ ފާއިދާ ވިޔަފާރިވެރިންނަށް މިހާތަނަށް ކޮށްފައިނުވާކަން އިލްޔާސް ވަނީ ފާހަގަކުރައްވާފައެވެ.
"އެތަނުގައި ވެރިންނަށް ނޫނީ އެތަނުގައި ހިންގަން އިންތިޚާބެއް ބާއްވަން ބޭނުންވީމައި އެތަނުގެ މަގާމަށް އަންނަން ބޭނުންވާ ވިޔަފާރިވެރިއަކަށް 750 ރުފިޔާ ހިފައިގެން ރާއްޖޭގެ އެއްކޮޅުން އަނެއް ކޮޅަށް ރެޖިސްޓްރީ ކޮށްފައި ހުންނަ ކުންފުނިތަކުގެ ތެރެއިން އެބޭފުޅުންނަށް ވޯޓް ދެއްވަން ބޭނުންފުޅުވާ ބޭފުޅުން ހަމައެކަނި އެ ތަނުގައި ރެޖިސްޓްރީ ވެލައިގެން އެ ތަނުގައި ތިއްބަވަނި" އިލްޔާސް ލަބީބް ވިދާޅުވި އެވެ.
ކުރިއަރަމުން އަންނަ މެދު ފަންތީގެ ވިޔަފާރިތަކަށް މޯލްޑިވްސް ނެޝަނަލް ޗެމްބަރ އޮފް ކޮމާރސް އިން އެއްވެސް ފުރުސަތެއް ދީފައެއް ނެތް ކަން މެމްބަރުން ވަނީ ފާހަގަކޮށްފައެވެ. ވިޔަފާރިވެރިންގެ ޖަމްއިއްޔާ އުފެދުނު މަގްސަދާއި ޚިލާފަށް ވަރަށް ސިޔާސީކޮށް، އެ މުއައްސަސާއިން މަސައްކަތް ކޮށްފައިވާއިރު، މަސައްކަތްކޮށްފައިވަނީ ވަރަށް ނުފޫޒު ގަދަ އެހެން ކަހަލަ ވިސްނުމެއްގައިކަން މެމްބަރުން ވަނީ ފާހަގަކުރައްވާފައެވެ.
ބިލާއި މެދު ބައެއް މެމްބަރުންގެ ޚިޔާލު ހުރީ ތަފާތުކޮށެވެ.
ބަޔަކު ބާރުވެރިކުރުވަން ބޭނުން ނަމަ ކޮންމެހެން ގާނޫނެއް ހަދަން ނުޖެހޭ ކަމަށް ހަނިމާދޫ ދާއިރާގެ މެމްބަރު ޢަބްދުލްޣަފޫރު މޫސާ ވަނީ ވިދާޅުވެފައެވެ. ޢަފޫރު ވިދާޅުވީ މިއަދު ކުރަންޖެހިފައި އޮތް ކަމަކީ އިންޑަސްޓްރީތަކާއި، ސިނާއަތްތަކާއި ގުޅޭ ގޮތުން ހަދާފައިވާ، ގާނޫނުތައް ރެގިއުލޭޓް ކުރުމުގެ މަސައްކަތް ކަމަށެވެ. މެމްބަރު ޢަފޫރު ވިދާޅުވީ މި ބިލް ގާނޫނަކަށް ވެއްޖެނަމަ ވިޔަފާރިތައް ކަސްތޮޅު އެޅުވުމަށް ބަޔަކު، މި ގާނޫނު ބޭނުންކޮށްފާނެ ކަމުގެ ބިރު އެބައޮތް ކަމަށެވެ.
"ދުނިޔޭގެ ގައުމުތަކުގައި މި ކަންކަން ހިގާ އުސޫލަށް މި ގައުމު ބައްޓަންވެގެން ދިޔުމަށް، މި ގާނޫނު އަތުވެއްޖެނަމަ މިއީ ވިޔަފާރިވެރިން ކަސްތޮޅު އެޅުވުމަށްޓަކާ ވަކި ބަޔެއްގެ ނުފޫޒު ފޯރުވުމަށް ބޭނުންކުރާ ގާނޫނަކަށް ވެގެން ހިގައިދާނެ ކަމަށް." އަބްދުލް ޢަފޫރު މޫސާ ވިދާޅުވިއެވެ.
އިދިކޮޅު ޕީއެންސީގެ މާވަށު ދާއިރާގެ މެމްބަރު މުހައްމަދު ސައީދު ވަނީ، ބިލްގައި ހުރި އޭނާ ގަބޫލުނުކުރައްވާ ކަންތައް ފާހަގަކުރައްވާފައެވެ.
ސައީދު ވިދާޅުވީ ޗެމްބަރ އޮފް ކޮމާރސް އުފެދިގެން އަންނައިރު ފައުންޑަރ މެމްބަރުން ތިބެންވާނެ ކަމަށް ބިލްގައި އެބައޮތް ކަމަށާއި، އެކަމާއި ދެކޮޅު ކަމަށެވެ. ސައީދު ވިދާޅުވީ ޗެމްބަރ އޮފް ކޮމާރސް އެއް މި އުފައްދަނީ އިގްތިސާދުގެ ކަންތައްތައް ކުރިއަރުވާ ތަރައްގީކޮށް ޕްރައިވެޓް ސެކްޓަރަށް ލަފާދީ، ޕްރައިވެޓް ސެކްޓަރަށް ހުރި ދަތިތަށް އޮޅުން ފިލުވާ ސަރުކާރާއި އެކު މަޝްވަރާ ކޮށް ކަންކަން ކުރުމަށް ފަސޭހަ ކުރުމަށްޓަކާ ކަމަށެވެ.
އެހެންވީމަ ފައުންޑަރ މެމްބަރުން ތިބެންޖެހޭނެ ކަމަށް ގަބޫލުނުކުރައްވާ ކަމަށެވެ.
"އަޅުގަނޑު ވަރަށް ބޮޑަށް އެޑޮވޮކޭޓް ކުރަން ވިޔަފާރިވެރިންގެ ތެރެއިން، ވިޔަފާރިވެރިންނޭ އަޅުގަނޑު މި މާނަ ކުރަނީ އެންމެ ކުދި އަދި މެދު ފަންތީގެ ވިޔަފާރިތައް ހިމެނޭ ގޮތަށް، ހުރިހާ ވިޔަފާރިއެއް ޝާމިލްވާ ގޮތަށް މެމްބަރުން ކަނޑައެޅިގެން މެމްބަރުންގެ ތެރެއިން އިންތިޚާބު ކުރެވިގެން އަންނަ ބަޔަކު މިފަދަ ޖަމްއިއްޔާއެއްގެ ނުވަތަ ޗެމްބަރެއްގައި ތިބުން." މުހައްމަދު ސައީދު ވިދާޅުވިއެވެ.
މި ބިލަކީ ރާއްޖޭގެ ޑިމޮކްރަސީ ހަރުދަނާވަމުން ދާއިރު ބައިނަލްއަގްވާމީ އެހެން ގައުމުތަކާއި ފައި ހަމަކުރުމަށްޓަކައި ޗެމްބަރ އޮފް ކޮމާރސް އަކީ ގާނޫނީ ހައިސިއްޔަތެއް ލިބިގެން ގާނޫނުގައި ބަޔާންކުރާ ތަރުތީބެއްގެ ދަށުން އިންތިޒާމްވެގެން ހިގާ ތަނަކަށް ހެދުމަށްޓަކާ ހުށަހެޅުނު ބިލެކެއެވެ.
