ދިވެހިރާއްޖޭގެ ދަނޑުވެރިކަމުގެ ދާއިރާ ދެމެހެއްޓެނެވި ގޮތެއްގައި ތަރައްޤީކޮށް ކުރިއެރުވުމަށް ސަރުކާރުން ކުރައްވަމުން ގެންދަވާ މަސައްކަތްތަކަށް މާލީ އެހީތެރިކަން ފޯރުކޮށްދިނުމަށް މުޙައްމަދު އުމަރު މަނިކު ފައުންޑޭޝަން އާއި މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ އާއި ދެމެދު އަންގާރަ ދުވަހު އެމް އޯ ޔޫ އެއްގައި ސޮއިކޮށްފިއެވެ.

އަންގާރަ ދުވަހު ސޮއިކުރެވިގެން ދިޔަ އެމްއޯޔޫގައި ސަރުކާރުގެ ފަރާތުން ސޮއިކުރެއްވީ މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު އަދި މުޙައްމަދު އުމަރު މަނިކު ފައުންޑޭޝަންގެ ފަރާތުން ފައުންޑަރ މުޙައްމަދު އުމަރު މަނިކުއެވެ.

މި އެއްބަސްވުމުގެ ދަށުން މުހައްމަދު އުމަރު މަނިކު ފައުންޑޭޝަންއިން މާލީ އެހީތެރިކަން ފޯރުކޮށްދިނުމަށް އެއްބަސްވި މައިގަނޑު ކަންކަމުގެ ތެރޭގައި ދަނޑުވެރިކމުގެ އެކި ދާއިރާތަކުން ރާއްޖެއިން ބޭރުން ބެޗްލާސް ޑިގްރީ ހާސިލް ކުރުމަށް 3 ސްކޮލަރޝިޕް ދިނުމާއި، 6 މަސްދުވަހުގެ މުއްދަތަށް 6 ބޭފުޅަކު ރާއްޖެއިން ފޮނުވައިގެން ފީލްޑް އޮފިސަރުންގެ ގޮތުގައި ތަމްރީން ކުރުމުގެ އިތުރުން ދަނޑުވެރިކަމުގައި ދިމާވާ އެކިއެކި ބަލިތައް އަދި ރުކުމަޑީގެ ބާވަތްތައް ދެނެގަނެ އެބަލިތައް ތަހުލީލު ކުރުމަށާއި ޕެރަސައިޓް ބްރީޑް ކުރުމަށް ލެބޯޓްރީއެއް ޤާއިމްކޮށްދިނުން ހިމެނެއެވެ.

މި އެއްބަސްވުމުގެ މައިގަނޑު މަޤަސަދުތަކުގެ ތެރޭގައި ހިމެނެނީ ރާއްޖޭގައި ކުރާ ދަނޑުވެރިކަމަކީ ތިމާވެއްޓަށް ވީހާ ވެސް ގެއްލުން ކުޑަވާނޭހެން ކުރެވޭނެ މަސައްކަތްތަކަކަށް ހެދުމާއި، ދަނޑުވެރިކަމުގައި ބޭނުންކުރަމުންދާ ޤުދުރަތީ ވަސީލަތްތައް އަންނަން އޮތް ޖީލުތަކަށް ރައްކާތެރިކަމާ އެކު ވާޞިލްކޮށްދިނުމާއި، ދަނޑުވެރިކަމުގެ މަސައްކަތް ކުރާގޮތުން އިންސާނުންގެ ސިއްހަތަށް ކުރާ ނަވަތަ ކޮށްފާނެ ނޭދެވޭ އަސަރުތައް ކުޑަކުރުމެވެ. އަދި ދަނޑުވެރިކަމުގެ މަސައްކަތުން އުފައްދާ ތަކެއްޗަކީ އިންސާނުންނަށް ކެއިންބުއިމަށް ރައްކާތެރި ތަކެތި ކަމަށް ހެދުމާއި ދަނޑުވެރިކަމުގެ އުފެއްދުންތެރިކަން އިތުރުކުރުމާއި، ދަނޑުވެރިކަމުގެ މަސައްކަތުން ހޯދާނަފާ އިތުރުވާނެ މަގުތައްފަހި ކޮށްދިނުމަށްޓަކައި، ދަނޑުވެރިކަމުގެ ދާއިރާއިން މީހުންބިނާ ކުރުން އިތުރު ކުރުމެވެ.

މި އެމްއޯޔޫގެ ސަބަބުން ދިވެހިރާއްޖޭގެ ދަނޑުވެރިކަން ކުރިއެރުވުމަށް ދިމާވެފައިވާ ގިނަ ގޮންޖެހުންތަކަށް އެދެވޭ މިންވަރެއްގެ ކުރިއެރުން ލިބިގެންދާނެ ކަމަށް ޤަބޫލުކުރެވެއެވެ.