ހިމާޔަތްކޮށްފައިވާ މަޑީގެ ބާވަތެއް ކަމުގައިވާ ނަރު ނަގޫ މަޑިއަކަށް، އައްޑޫގައި އަނިޔާކުރި މައްސަލައެއް ބަލަން އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) އިން ނިންމައިފިއެވެ.
އީޕީއޭއިން ހޯމަ ދުވަހު ކުރި ޓްވީޓެއްގައި ވިދާޅުވީ، މޯލްޑިވްސް ޕޮލިސް ސާވިސްގެ އެހީތެރިކަމާއި އެކު އައްޑޫގައި މަޑިއަކަށް އަނިޔާކުރި މައްސަލަ ބަލަމުން އަންނަ ކަމަށެވެ. ރާއްޖޭގައި ދިރިއުޅޭ ހުރިހާ ބާވަތެއްގެ މަޑިތަކަކީ ވެސް 2014 ވަނަ އަހަރުގެ ޖުލައި މަހުގެ 14 ވަނަ ދުވަހުން ފެށިގެން ހިމާޔަތް ކުރެވިފައިވާ އެއްޗެހިތަކެކެވެ.
ސޯޝަލް މީޑިއާގައި ދައުރުވާ ވީޑިއޯއަށް ބަލާއިރު ފެންނަނީ ބަޔަކު މީހުން އެ މަޑީގެ ނަގޫ ބުރިކޮށްލުމަށް ބަނޑުދަށް ފަރާތުގައި ވަޅިއަޅާ މަންޒަރެވެ. އަދި އެއަށް ފަހު، ބުޅިގަނޑެއްގައި އަޅުވައިގެން ދަމާފައި ގެންގޮސް އެ މަޑި މޫދަށް އެއްލާލައެވެ. މި މަންޒަރު ބަލަން އެކަން ހިނގި ރަށުގެ ބަނދަރުމަތީ ސަރަހައްދުގައި އިތުރު ބަޔަކު މަޑުކޮށްލައިގެން ބަލަހައްޓައިގެން ތިބޭ މަންޒަރު ވެސް ވީޑިއޯއިން ފެނެއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި މި ހާދިސާ ހިނގާފައިވަނީ އައްޑޫ އަތޮޅު ހިތަދޫ ބަނދަރު ސަރަހައްދުގައެވެ.
މަޑީގެ ކަށި ނެއްޓުމަކީ ރާއްޖެއާއި ދުނިޔޭގެ އެކި ގައުމުތަކުގައި ވެސް މަސްވެރިން "ރައްކާތެރިވާން" ކަމަށް ބުނެ ކުރަމުން އަންނަ ކަމެކެވެ. މަޑީގެ ކަށި އަލުން އަލުން ފެޅި ކަމުގައިވީ ނަމަވެސް، ނަގޫ ބުރިކޮށްލުމުން ލޭ މަނާނުވެގެން މަޑި މަރުވާނީއެވެ. އަދި މޫދަށް ލުމުން ލޭ ބޭރުވާ މިންވަރު އިތުރުވާނެއެވެ.
