އޭސީސީގެ ތަހުގީގުތަކަށް ބޭނުންވާ ލިޔެކިޔުންތައް ޕީއެސްއެމް ފަދަ ބައެއް ކުންފުނިތަކުގައި ނެތް ކަމަށާ އެތަކެތި ގެއްލިފައިވާ ކަމަށް އޭސީސީ ގެ ނައިބު ރައީސް މުއައްވިޒް ރަޝީދު ވިދާޅުވެއްޖެއެވެ. އޭނާ އެހެން ވިދާޅުވީ ދައުލަތުގެ އަދި ދައުލަތް ހިއްސާވާ ކުންފުނިތަކުގައި ހިންގާ ކޮރަޕްޝަން ގެ އަމަލުތައް ހުއްޓުވުމާ ގުޅޭގޮތުން އޭސީސީ މެމްބަރުން ހާޒިރުކޮށް ސްޓޭޓް އޯންޑް އެންޓަރޕްރައިސަސް ކޮމިޓީއިން ހޯމަ ދުވަހު ބޭއްވި ބައްދަލުވުމުގައެވެ.
ބައެއް ލިޔެ ކިޔުންތައް ގަސްދުގައި ނައްތާލާފައި އެބަހުރި ކަމަށާއި މުއައްޒަފުން އެ ލިޔެކިޔުންތައް އެއް އިރަކު ހުރިކަމުގައި އޭސީސީއަށް މައުލޫމާތު ދިން ނަމަވެސް ތަހުގީގު ކުރަން ދިއުމުން ލިޔެ ކިޔުންތައް ފެނިފައިނުވާ ކަމަށް ވެސް މުއައްވިޒް ރަޝީދު ވިދާޅުވިއެވެ.
ކުންފުނިތަކުގެ ކޮރަޕްޝަންގެ މައްސަލަތައް ތަހުގީގު ކުރުމަށް ދިމާވާ ދަތިތަކާއި ގުޅޭގޮތުން ވާހަކަފުޅު ދައްކަވަމުން މުއައްވިޒް ރަޝީދް ވިދާޅުވީ ، ޕީއެސްއެމް ފަދަ ކުންފުނި ތަކުގެ ތަހުގީގަށް ބޭނުންވާ ބައެއް ލިޔެ ކިޔުންތަކަށް އެދުމުން އެ ކުންފުނިތަކުން އެ ލިޔެކިޔުންތައް ވަނީ ގެއްލިފައި ކަމަށް ފަހުން ބުނެފައިވާ ކަމަށެވެ.
ޕީއެސްއެމް ގެ މައްޗަށް ކޮރަޕްޝަނުގެ 14 މައްސަލައެއް މިހާރު ވެސް ދަނީ ތަހުގީގު ކުރެވެމުންނެވެ. ޕީއެސްއެމް ގެ އިސްވެރިންނާ ގުޅުން ހުރި ކޮރަޕްޝަންގެ މައްސަލަތަކުގެ ތެރޭގައި ހަދާ މުޅިން ނުނިމިހުރި އިމާރާތެއްގައި މީޑިޔާ އިންސްޓިޓިއުޓެއް ގާއިމު ކުރުމަށްޓަކާ ކުއްޔަށްހިފި މައްސަލައަކާއި އައިޓީބީގެ ޕްރޮޖެކްޓް ގެ ތެރެއިން 41 މިލިއަން ރުފިޔާއަކާ ގުޅުން ހުރި މައްސަލައެއް ހިމެނެއެވެ.
މި މައްސަލަތައް ބެލުމަށްޓަކައި އޭސީސީ ގެ ޚާއްސަ ތަހުގީގު ޓީމުތަކެއް ދަނީ މަސައްކަތް ކުރަމުންނެވެ.
