އެއް ފަހަރު ބޭނުންކޮށް އުކާލާ ޕްލާސްޓިކް ބާވަތްތައް މަނާކުރުމަށް ޣިޔާސުއްދީން އިންޓަނޭޝަނަލް ސްކޫލު ކުދިންނާއި 16 ސްކޫލެއްގެ ދަރިވަރުން ރައްޔިތުންގެ މަޖިލީހަށް ހުށައެޅި ގަރާރު ފާސްކޮށްފިއެވެ.

ގަރާރު ފާސްކޮށްފައިވަނީ ހާޒިރުވެވަޑައިގެން ތިއްބެވި 65 މެމްބަރުންގެ ތެރެއިން 64 މެމްބަރުންގެ ވޯޓުންނެވެ.

އެއް ފަހަރު ބޭނުންކޮށްފައި އުކާލާ ޕްލާސްޓިކް ބޭނުން ކުރުން ހުއްޓާލުމަށް ދަރިވަރުން ހުށައަޅާފައިވާ ގަރާރުގައި ހިމެނޭ ކަންތައްތަކުގެ ތެރޭގައި އެއް ފަހަރު ބޭނުން ކޮށްފައިވާ އުކާލާ ޕްލާސްޓިކް ފުޅި އާއި ޕްލާސްޓިކް ހޮޅި ވިޔަފާރިތަކުގައި ބޭނުން ކުރުން ހުއްޓުވަން ބާރު އެޅުން ހިމެނެއެވެ. އަދި ޕްލާސްޓިކުގެ ބާވަތްތައް އާއްމުން ބޭނުން ކުރުމުން ދުރުކުރުމަށް ހޭލުންތެރި ކުރުމުގެ ޕްރޮގްރާމް ހިންގުމަށާއި، ޕްލާސްޓިކް ފުޅި ރާއްޖޭގައި ބޭނުންކުރުން މަދުކުރަމުން ގޮސް 2024 ގެ ނިޔަލަށް އެފަދަ ފުޅިތައް މަނާ ކުރުން ވެސް ގަރާރުގައި ހިމެނެއެވެ.

އެއް ފަހަރު ބޭނުންކޮށްފައި އުކާލާ ޕްލާސްޓިކް ހޮޅިޔާއި، ސުޕާރީ ކޮތަޅު 2020 ނިޔަލަށް ދިވެހިރާއްޖޭގައި މަނާކުރުގެ އިތުރުން 2025 ގެ ނިޔަލަށް ހުރިހާ ބާވަތެއްގެ ޕްލާސްޓިކް މަނާކުރުން ވެސް އެ ގަރާރުގައި ހިމެނެއެވެ.

އެ ގަރާރަކީ ޣިޔާސުއްދީން ސްކޫލުގެ ދަރިވަރުންނާއި 16 ސްކޫލަކާއި ގުޅިގެން މަޖިލީހުގެ ކްލައިމެޓް ޗޭންޖް ކޮމިޓީގެ މެމްބަރުންނާއި ބައްދަލުކޮށް ހުށައަޅަފައިވާ ސީޓީގެ މައްޗަށް އެ ކޮމީޓީން މަޖިލީހުގެ ތަޅުމަށް ފޮނުވި ގަރާރެކެވެ.