ގަވާއިދާއި ޚިލާފަށް 200 އަށް ވުރެ ގިނަ ތަންތަނުގައި ބިދޭސީން ވިޔަފާރިކުރަމުން އަންނަ ކަމަށް މާލެ ސިޓީ ކައުންސިލުން ބުނެފި އެވެ.
ރައްޔިތުންގެ މަޖިލީހުގެ ލާމަރުކަޒީ ކޮމިޓީގައި މެމްބަރަކު ވަނީ ބިދޭސީން ބަތް ޕާރްސަލް ކުރުމުގެ ވިޔަފާރި މާލެ ސިޓީގައި ކުރަމުން އަންނާތީވެ، އެކަން ކައުންސިލަށް ހުއްޓުވިފައި ނުވަނީ ކީއްވެތޯ ސުވާލު ކުރައްވާފައެވެ. އެ ސުވާލަށް ޖަވާބުދެމުން ކައުންސިލުން ބުނެފައިވަނީ، ގަވާއިދާއި ޚިލާފަށް ބިދޭސީން ވިޔަފާރި ކުރަމުން އަންނަ 200 އަށް ވުރެ ގިނަ ތަން އެބަހުރި ކަމަށާއި، ނަމަވެސް އެ ވިޔަފާރިތަށް ހުއްޓުވުމުގައި ހުރިހާ މުއައްސަސާއެއް ފެއިލްވެފައިވާ ކަމަށެވެ.
ކައުންސިލުން ބުނީ ގަވާއިދާއި ޚިލާފަށް ވިޔަފާރި ކުރަމުން އަންނަ ބިދޭސީންނާއި މެދު ފިޔަވަޅު އެޅުމަކީ ކައުންސިލަށް ކުރެވޭނެ ކަމެއް ނޫން ކަމަށެވެ. އަދި އެފަދަ މައްސަލައެއް ފާހަގަކުރެވިގެން، މުއައްސަސާތަކައް ރިޕޯޓް ކުރި ނަމަވެސް، އެ ފަރާތްތަކާއި ދޭތެރޭ ފިޔަވަޅު އެޅުމުގައި ހުރިހާ މުއައްސަސާއެއް ފެއިލްވެފައިވާ ކަމަށް ކައުންސިލުން ބުންޏެވެ.
ގަވާއިދާއި ޚިލާފަށް އުޅޭ ބިދޭސީން އަތުގައި ހުންނަންޖެހޭ ރަސްމީ ލިޔެކިޔުންތައް ނެތް ކަމަށާއި، އެ މީހުން ބުނާ ނަމާއި ޕާސްޕޯޓްގައި އޮންނަ ނަމާއި ދިވާނުވުން، ފަދަ ގިނަ މައްސަލަތައް ހުރުމުން އެފަދަ ވިޔަފާރިތަށް ހުއްޓުވާ، އެ މީހުން ފޮނުވުމުގައި ގިނަ ގޮންޖެހުންތަކާއި ކުރިމަތިވެފައިވާ ކަމަށް ކައުންސިލުން ބުންޏެވެ. އަދި ކައުންސިލުން ބުނީ ގަވާއިދާއި ޚިލާފަށް ވިޔަފާރި ކުރަމުން އަންނަ ބިދޭސީންގެ ވިޔަފާރިތަށް ހުއްޓުވުމުގައި، ރައްޔިތުންގެ މަޖިލިސްގެ އެހީތެރިކަން ލިބޭނެ ކަމަށް އުއްމީދުކުރައްވާ ކަމަށެވެ.
ކައުންސިލުން ބުނީ މި ކަމުގައި ހުރިހާ މުއައްސަސާތަށް ގުޅިގެން މަސައްކަތް ކުރަންޖެހޭ ކަމަށެވެ.
ރާއްޖޭގައި މިހާރުވެސް 250،000 ބިދޭސީން މަސައްކަތް ކުރަމުންދާ ކަމަށާއި، އޭގެ ތެރޭގައި އެ ގަވައިދާއި އެއްގޮތަށް އަދި ގަވައިދާއި ހިލާފަށް މަސައްކަތް ކުރާ ބިދޭސީން ވެސް ހިމެނޭ ކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވަނީ ވިދާޅުވެފައެވެ.
