ނައިޓް މާކެޓް އަދި ފެއަރ ބޭއްވޭނީ ރަމަޟާން މަހުގެ ކުރިން އަދި އަހަރުގެ ސްކޫލް ބޮޑު ޗުއްޓީ ދުވަސްވަރު ކަމަށް މާލޭ ސިޓީ ކައުންސިލުން ކަނޑައަޅައިފިއެވެ.
މި ގޮތަށް ކަނޑައަޅާފައިވަނީ ނައިޓް މާރކެޓް އަދި ފެއަރ ބޭއްވޭނެ ދުވަސްތައް ކަނޑައެޅުމަށް ހޮނިހިރު ދުވަހު ބޭއްވި ކައުންސިލް ބައްދަލުވުމުގައެވެ.
ހޮނިހިރު ދުވަހު ބޭއްވި ކަައުންސިލް ބައްދަލުވުމުގައި ނިންމާފައިވަނީ ނައިޓްމާކެޓް އަދި ފެއަރ ބޭއްވޭނީ އަހަރަކު ދެ ފަހަރު ކަމަށާއި، އެއީ ރަމަޟާން މަހުގެ ކުރި އަދި އަހަރުގެ ސްކޫލް ބޮޑު ޗުއްޓީ ދުވަސްވަރެވެ. އަދި މި ދުވަސްތަކުގައި ނައިޓް މާރކެޓް އަދި ފެއަރ ބޭއްވޭނެ މުއްދަތަކީ ހަތް ދުވަސް ކަމަށް ކައުންސިލުގެ ބައްދަލުވުމުގައި ކަނޑައަޅާފައެވެ. މި ދުވަސްތަކުގައި ގްރޭޓާރ މާލެ ސަރަހައްދުގެ މާލެ ސިޓީ، ވިލިމާލެ، އަދި ހުޅުމާލޭގައި ބޭއްވުމަށް ފުރުސަތު ހުޅުވާލެވޭނެ ކަމަށް ކައުންސިލުން ވަނީ ބުނެފައެވެ.
ފެއަރ، ނައިޓް މާރކެޓް، މަގުމަތި ބާޒާރު ބޭއްވުމުގެ ހުއްދަ ދޫކުރުމާއި ގުޅޭ ގޮތުން ކައުންސިލުން 19 ޖޫން އަދި 25 ޖޫންގައި ގެޒެޓް ކޮށްފައިވާ އިއުލާން މިހާރު ކެންސަލްކޮށްފައިވާ ކަމަށް، ކައުންސިލުން ވަނީ ބުނެފައެވެ.
އިކޮނަމިކް މިނިސްޓްރީން ވަނީ ނައިޓްމާރކެޓް ނުވަތަ މަގުމަތީ ބާޒާރުތައް ބާއްވަން ޖެހޭނެ ގޮތުގެ އުސޫލެއް ކަނޑައަޅައި، އެ އުސޫލަށް އަމަލު ކުރަން ފަށައިފަ އެވެ. އެގޮތުން އިމްޕޯޓް މުދަލުގެ ވިޔަފާރިކުރެވޭ ގޮތަށް، ފެއަރ، ނައިޓްމާރކެޓް ނުވަތަ މަގުމަތީ ބާޒާރު ބާއްވަން ވާނީ ކޮންމެވެސް މުނާސަބަތަކާއި ގުޅުވައިގެން ކަމަށް ވެސް މިނިސްޓްރީން ކަނޑައެޅި އުސޫލުގައި ވަނީ ބުނެފައެވެ.
އެގޮތުން، ފާހަގަކުރެވޭނެ މުނާސަބަތުތައް ކޮންމެ އަހަރަކު އެއްފަހަރު، ސިޓީއެއްގައިނަމަ، ސިޓީ ކައުންސިލުން ނުވަތަ ރަށެއްގައިނަމަ، ރަށު ކައުންސިލުން އާންމުކޮށް އިއުލާން ކުރަންވާނެ ކަމަށް ވެސް މިނިސްޓްރީގެ އުސޫލުގައި ބުނެފައި ވެއެވެ.
